Тарқатып айтсақ, Сауд Арабиясынан келген кардиохирург, Корольдік мемлекеттік кардиохирургия саласындағы клиниканың директоры Мұхамед Саллах Алрешхидан шеберлік сабағы барысында жүректің қолқа қақпақшасын ауыстыратын ең жаңа «Avalus» биологиялық протезін 52 және 60 жастағы екі пациентке имплантациялады.
Инновациялық операцияға өңірлердегі жетекші кардиохирургиялық клиникалардың хирургтері да ортақтасып, олар жүре келе пайда болған және туабітті қолқа (аорта) қақпақшасы кеселіне биологиялық протезді имплантациялау жөніндегі оқытудан өтті.
Алматыдағы Кардиология және ішкі аурулар ҒЗИ басқарма төрағасы Марат Пашимов: «Клиникамыздың базасында ТМД аумағында алғаш рет Сауд Арабиясының жетекші кардиохирургінің қатысуымен жүректің қолқа қақпақшасын ауыстыру үшін соңғы буындағы биологиялық протез имплантацияланды. Бұл биологиялық жүрек қақпақшасының протезін инновациялық тұрғыда жетілдірудің 40 жылдық тәжірибесіне негізделген. Бүкіл әлемдік тәжірибедегі ең үздіктерін біріктіре отырып, осындай қақпақша құрылса, ол жоғары гемодинамикалық көрсеткіштерімен, пайдалану жеңілдігімен, беріктігімен, Варфаринді қолдану қажеттілігі болмауымен ерекшеленеді», дейді.
Осы операциядан өткен, яғни қолқа қақпақшасының қызметінде кінәраты бар екі науқас жүрек айналасының қысып ауыруы, көп қимылдаған кезінде ентігу, тез шаршап қалу сияқты шағымдарымен стационарға түсіп, оларға дәрігерлердің хирургиялық араласуы қажеттігі көрінген.
«Жүрек қақпақшаларын протездеу технологиялары үздіксіз дамып келеді. Жүрек қақпақшаларын протездеу операциясы жүректегі қан ағымын қалыпқа келтіруге, жүрек жеткіліксіздігінің дамуына жол бермей, жүрекке қосымша салмақты жою үшін жүргізіледі. Ал асқыну қаупі жоғары және егде жастағы науқастарға жүрек қақпақшаларының биологиялық протездерін қолданған жөн. Биологиялық қақпақшалардың маңызды артықшылықтарының бірі – қанды сұйылтатын дәрілер-антикоагулянттарды өмір бойы қабылдаудың қажеттілігі тоқтайды», дейді кардиохирургия бөлімшесінің меңгерушісі Рүстем Төлеутаев.
Мамандардың айтуынша, жаңа буын жүрек қақпақшасының биологиялық протезі оңай және ұзақ қызмет етеді. Қақпақша имплантациясы үшін стандартты тәсіл де, стернотомияны қажет етпейтін, ағзаға барынша зақымы аз техника да қолайлы, бұл кеуде қуысы қаңқасын сақтауға, инфекциялық асқынулардың қаупі мен жанға бататын ауыртпалықты төмендетуге мүмкіндік береді. Сондай-ақ операциядан кейін тыныс алу жеңілдеп, ұзақ уақыт бойы корсет кию қажеттілігі жойылады да, қалыпты өмірге тезірек оралуға мүмкіндік ұлғаяды.
АЛМАТЫ
