«Сүт пен бал»

Рупи Каур есімі бүгінде әлем оқыр­мандарына жақсы таныс. «Сүт пен ­бал» өлеңдер жинағы New York Times-­тің бестселлер кітабы атанған қалам­гер арудың түп-тамыры үнділік. Қазір Канадада тұратын ол әлеуметтік желі­де белсенді. Рупи Каур әлеуметшіл, қоғамдық ахуалдарды батыл жазатын, жүрекке, жан құзарына үңіле білетін ақын. «Сүт пен балдағы» қысқа ғана ақ өлеңдер ойлы оқырманды әрі-сәрі күйге түсіреді.

«Сен

қайсар қадамдарыңмен

шегеледің аяғымды жерге.

Сосын

тұруды талап еттің...

Немесе,

Мен оны сүюді үйренемін

өзімді сүю арқылы...»

«Сүт пен бал» төрт бөлім­нен­ құралған. Бірінші бөлім – мұң, екінші – махаббат, үшін­ші – жарылыс, төртінші – ем­делу бөлімі. Рупи Каур­­­­дың­ қысқа да қоғалы ойлы­ ақ­ өлеңдерінен ләззат алуға сезім­талдылығын жоғалт­па­­ған жүрек, балаңды­ғын­ жо­ғалт­­паған сергек көңіл­ керек.­ Әйт­пегенде, жан ұлпасы се­міп,­ жүрегі қатай­ған­ жандар үшін­ жинақ бос цита­талар құры­лымы болып көрінуі бек мүм­кін.

«Мен қара жерге

шым батқым келеді

көз жасы, аяғым

қолым

тереңге ену үшін...

Немесе,

Ең бірінші

Тіле өзіңе,

қалған ғұмырыңды,

өз оңашалығыңда өткізуді...»

Каур сыни мысқыл арқылы Шы­ғыс Азиядағы әйелдер мәсе­лесін, олардың басынан­ арылмаған қитұрғы сая­сатты батыл көтере білді. Кітапта тұрмыстық зорлық-зом­бы­лық­, оның зардапта­рынан туын­даған психологиялық ком­плекстер, жалтақ ғадет­тер, бойдан суырғанмен ізі қал­ған жалған нанымдар кес­теленген. Әйел әлемінің әрне­шік күйі мен шұңғыма сырлары­ кітапта жан-жақты көрініс тапқан. Каур әлдебір топтардың сойылын соғу­дан, насихатталған ұғымдардың жете­гіне еруден аулақ. Кері­сін­ше фило­софиялық, пси­хо­­ло­­­гиялық тұрғыда мәселе мәнін ашуға ынтық.

«Сенің қаның,

менің қантамырымнан ағады.

Айтшы,

мұны қалай

ұмыта алармын?»

Кейбір қысқа қос тармақ­тар­дан даналық лебі сезіледі.

«Жұмсақ болу

құдіретті болу

деген сөз...»

 «Сүт пен бал» – махаббат, жо­ғалту, зор­лық-зомбылық, тазару, әйел құ­пия­сы жайлы кітап. Әр бөлімі нәурізек мұң­ға ендіріп қана қоймай, одан емделу жолын нұсқап, жоба көрсетеді. Оқыр­манды теңізіне шомылдырған, өзін тану жолында маяк бола білген жинақ қазақ оқырманына жетіп, төл тілге аударылса нұр үстіне нұр.