Оңтүстіктегі орақ

Оңтүстікте орақ қызған шақ. Жалпы, дархан даласы да, шөлі мен шөлейті де, қып-қызыл құмы да, асқаралы таулары мен қырмызы қыраттары да қызықтыратын өзгеше өңіріңізде биылғы егін орағының ерекшеліктері баршылық. Көктеміңіз кешігіп келді. Жер қызбай қойды. Алғашқы айларда төпеп жауған нөсерлер сәуіріңіздің соңына қарата сап тыйылды. Мамырыңыздан бастап тамшы тамбайтынға айналды. Есесіне тынымсыз соққан желіңіз жеті күндік сұрапыл дауылға ұласып, даланы да, қаланы да абыржытты. Көп нәрсені қиратып, жаздық бидай мен басқа да біраз дақылдарды құрғатып, қуратып тынды. Осының бәрі Байқоңырдан қайта-қайта ұшырылған зымырандардың залалы десетіндер де жеткілікті. Бәрібір, Оңтүстік диқан­дарының қабағында қалың кірбің жоқ. Күздік бидай мен арпаның дәні ауыңқырап кетсе де, әр гектарынан 11-12 центнерден өнім жиналатынына сенімді. Ысырапқа, ырғалып-жырғалуға жол бермей, тап-тұйнақтай тірлік жасап жатыр. Шілде басында жаппай орақ басталған. Айдың ортасы ауа облыстағы 196 мың гектар масақты дақылдың 50 мың гектардайының өнімі жиналды. Облыстық ауыл шаруашылығы басқармасы бас­шы­ларының мәлімдеуіне қарағанда, 245 мың тонна астық қамбаға құйы­лады деп жоспарлануда. Шіліңгір шілдеңіздің алғашқы жартысында күннің қызуы 40-43 градустан бәсеңдемеді. Диқан­дар қауымы еңбек қарқынын төмен­детпеді. Қазірдің өзінде Арыс аймағындағы егін орағы тәмам­далуға таяса, Сарыағаш-Келес белес­терінде де егінжайлардың ба­сым бөлігінде сары сабан жатыр. Бәй­дібек, Қазығұрт, Ордабасы, Сай­рам аудандарында орақ енді қыз­са, таулы Түлкібас пен Төле би аудандарында жаңадан басталды деуге болады. Оңтүстік өңірінде егістік алқаптарын әртараптандыру әдісі жүйелі жүзеленуде.  Бұрынғыдай емес, қатып қалған «тәртіпті» уақыт талабына, сұраныстарға сәйкестендіру жемісті жүргізілуде. Мақтаның көлемі бір жылдың өзінде 9 мың гектарға, майлы дақылдар 8,5 мың гектарға азайды. Ал, мал азығындық дақылдар былтырғыдан 43 мың гектарға көбейтілді. Оның ішінде жоңышқа 15 мың, арпа 17 мың, жүгері 11 мың гектарға арттырылды. Облыс әкімінің бірінші орынбасары Берік Оспанов бастаған басшылар мен мамандар Қазы­ғұрт тауының баурайындағы егін­жайларды егжей-тегжейлі аралап көрді. «Әртараптандырудың нәтижесі көрініп тұр, облыс бойынша мал азығын дайындау 70 пайызға жақындады, – дейді Берік Серікұлы. – Қазығұрт ауданында меже 90 пайызға жетіп қалды. Астық түсімі қуаңшылыққа байланысты біраз төмендегенмен, мал азығынан ұтылмаймыз». Мархабат БАЙҒҰТ, «Егемен Қазақстан». Оңтүстік Қазақстан облысы.