Жиырма күнге жалғасқан жарыс қорытындысы бойынша, жалпыкомандалық есепте 44 алтын, 15 күміс және 10 қола медаль олжалаған Қарағанды облысының спортшылары екінші рет үздік шықты. Екінші орынды 35 алтын, 9 күміс және 9 қола медаль жеңіп алған Атырау облысының өкілдері иеленсе, үздік үштікті 24 алтын, 16 күміс және 6 қола медальмен Ақтөбе облысы түйіндеді.
Паралимпия ойындары – төрт жылда бір рет өтетін еліміздегі ең маңызды спорттық іс-шара. Оның басты мақсаты – дене мүмкіндіктері шектеулі тұлғалар арасында саламатты өмір салтын насихаттау, елімізде паралимпиадалық спорт түрлерін дамыту және үздік өнер көрсеткен спортшыларды ұлттық құрама сапына іріктеу. Биыл Паралимпиада жарыстарына еліміздің барлық өңірінен әртүрлі жастағы спортшылар қатысты. Олардың арасында ең жас спортшы 16 жаста болса, ең үлкені 78 жаста. Қатысушылардың араcында 2016 жылғы Рио Паралимпиадасының жеңімпазы Зульфия Габидуллина, 2020 жылғы Токио Паралимпиадасының чемпионы Давид Дегтярев, жүлдегерлер – Әнуар Сариев пен Нұрдаулет Жұмағали, пара дзюдодан әлем чемпиондары Ақмарал Науатбек, Ерғали Шамей, басқа да ірі халықаралық жарыстардың жеңімпаздары да болды.
Биылғы ойындар барысында пара жеңіл атлетика (247 спортшы), пара үстел теннисі (157 спортшы) және пара жүзу (124 спортшы) спорт түрлерінен ең көп спортшы қатысқанын ерекше атап өткен жөн. Осы жарыс аясында алғаш рет елімізде Т-64 санаты бойынша протезбен жүгіруден жарыс ұйымдастырылды. Сонымен қатар биылғы Паралимпия ойындарында еліміздің 9 рекорды жаңартылды.
Сондай-ақ осы жарыстарда үздік өнер көрсеткен спортшылар ұлттық құрама сапына қабылданып, алда келе жатқан Ханчжоу-2022 IV Пара Азия ойындары мен XVII жазғы Паралимпия ойындарының іріктеу жарыстарына қатысуға мүмкіндік алды.
«Биылғы Паралимпия ойындары мен үшін өте қызықты өтті. Мықты спортшылардың арасында өз күшімді сынап көруге мүмкіндік берген ұйымдастырушыларға алғысым шексіз. Пара үстел теннисінен өткен S4 санатындағы сайыста еліміздің ең мықты теннисшілерінен басым түсіп, жарыс жеңімпазы атандым», деп ағынан жарылды пара үстел теннисінен ұлттық құрама спортшысы Мейірбек Өтепов.
