Қоғам • 06 Маусым, 2023

Қарасудағы қымызхана

564 рет
көрсетілді
3 мин
оқу үшін

Осыдан бір жарым ай бұрын Қарасу ауылында ашылған қымызхана бүгінде бүкіл Торғай өңіріне белгілі демалыс орнына айналды десек артық емес. Биыл бие байланғалы, шалғай ауылдың маңында, күре жолдың бойында тұрған қос киіз үйдің алды қонақтан құрғап көрген емес. Тіпті біраз жұрт Арқалық, Амангелдіден арнайы келіп, осы жерде шағын той-томалақтарын өткізіп кетеді.

Қарасудағы қымызхана

Қостанайдан Торғайға жо­лаушылап шыққан адам Әулиекөлден әрі қарай Аман­тоғайға дейін шамамен 260 шақырымдай жол жүреді. Осы екі аралықта жолай соғып, аз-кем аялдап, тынығып, жүрек жалғап алатын дәмхана жоқ. Ал Амантоғайдағы жалғыз дәм­хана қас қараймай тұрып жабылып қалады.

Жоқтың орнын толтыр­ғандай болған жол бойындағы дәмханаға әрі-бері ағылып жатқан жолаушылар да жиі түседі. Қымызхананы екі жігіт ашыпты. Екеуі де Қарасу ауы­лында тұрады. Екеуінің де есімдері – Еламан.

– Жол бойында асханаға сұраныс бар. Сондықтан досым екеуміз ақылдаса келіп, отбасымызбен бірігіп бір қы­мызхана ашу туралы шешімге келдік. Сәуірден бері жұмыс істеп жатыр. Аспазымыз да, әкімшіміз де – келіншектеріміз. Біз сырт­қы шаруаларды істеп, сұра­ғандарын әкеп беріп тұрамыз. Осыдан екі жыл бұрын жеке кәсіп ашып, мемлекеттен 500 мың теңге көлемінде қай­та­рым­сыз қаржылай көмек ал­ғанмын. Сөйтіп, дөнер жасай бастадым. Бірақ жалға ал­ған ғимаратым дұрыс болмай, ісім өніңкіремеді. Содан Еламан екі киіз үй сатып алып, бірігіп қымызхана ашайық деген ұсыныс айтты. Қа­зір келушілердің қалауы бойын­ша кез келген тағамды пі­сіре береміз. Дөнер, пицца, кәуап, қымыз, құймақ, май, ба­уырсақ – бәрі бар. Тап­сырыс бойынша бұқпа пісіріп, ет асып береміз. Мәселен, 7 ма­мырда 3-4 күн қатарынан екі киіз үй босамай қалды. Әйел адамдар ер азаматтарға мерекелік дас­тарқан жасады. Мектеп бі­ті­рушілерден де тапсырыс­тар түсіп жатыр, – дейді қы­мыз­­хананың иесі Еламан Са­ғымбай.

Анадай жерде бір-екі жыл­қы, әріректе жалғыз қара есек жайылып жүр екен. Бұл жануарлар да осы қымызханаға қызмет ететін болып шықты. Балалар қазақы шапан киіп есекке мініп қызықтайды. Өйт­кені есек малы бұл өңір­де көп кездесе бермейді. Батырдың киімін киіп, ат мініп, суретке түсуге де болады. Киіз үйдің ар­тында садақ тартып, нысана көздейтін алаң да бар.

Кәсіп иелері он шақты бие байлап отыр. Мұның сыртында, жиырма шақты си­ыр сауып, сүтінен құрт, сары май, ірімшік айырып отыр. Бие мен сауын сиыр арнайы аппаратпен сауы­лады. «Рахат екен. 8-сынып оқитын інім мен келіншегім өздері сауа бе­реді. Жолшыбай тоқ­таған кісі­лерге қаймақ, са­ры май, қы­мыз сатамыз. Қа­зір көбіне, сары май мен бал қы­мыз өтіп тұр», дейді Еламан.

 

Қостанай облысы,

Амангелді ауданы