Бұл ауылда бұрын-соңды мәдениет үйі болмаған. Осы уақытқа дейін кітапхана шағын балабақша ғимаратында орналасқан еді. Аумағы өте тар болғандықтан, әртүрлі шаралар өткізуге де қолайсыз-тұғын. Сондықтан да бұл күні ауыл тұрғындары үшін ақ түйенің қарны жарылғандай болды. Салтанатты жиынға аудан басшылығы қатысып, ауыл тұрғындарын көптен күткен қуанышпен құттықтады. Ерекше үлгіде салынған мәдениет үйінің ашылуына келген қонақтар да өздерінің жылы лебіздерін білдірді. Көп жыл ауылдық кітапханада қызмет атқарған ақ жаулықты әже Гүлжамал Кіжікова киелі шаңырақтан береке-бірлік, ынтымақ арылмасын деген ниетпен шашу шашты.
Кең әрі жарық ғимараттың екінші қабатында ашылған кітапхана жаңа үстелдермен, жұмсақ орындықтармен және кітап сөрелерімен қамтамасыз етілді. Қазіргі уақытта кітапханада оқырман саны 608-ге жеткен. 9 748 кітап қоры бар. Жаңа кітаптармен жыл көлемінде үздіксіз толықтырылып келеді. Сонымен қатар кітапханада шахмат, дойбы үйірмесі жұмыс істеп тұр. Заман талабына сай интернет желісімен, компьютермен, құжаттарды цифрлауға, қағазға басып шығаруға арналған көпфункциялы құрылғымен қамтамасыз етілген. Атаулы күндерге, айтулы даталарға байланысты түрлі кездесулер, сұхбаттар, оқырман конференциялары, дөңгелек үстелдер өткізіліп тұрады. Атап айтсақ, «Дүниежүзілік кітап және авторлық құқықты қорғау» күніне орайластырылған «Kітап шоу-2023» республикалық акциясы аясында Айнабұлақ ауылдық кітапханасында да кітап фестивалі өтті. Іс-шарада оқырмандарға «Қиялдар әлемі» атты кітап көрмесі ұсынылды. Көрмеге оқырмандар назарына әр елдің ертегі кітаптары, көркем суреттелген иллюстрациялы кітаптар мен QR код арқылы ұялы телефоннан көруге арналған ертегілер жинағы қойылды. Сонымен қатар ертегі кейіпкерлерінің макеттер көрмесі ұсынылып, қиялдар әлеміне саяхат жасалды. Осы орайда «Менің сүйікті кейіпкерім» тақырыбында оқырмандармен пікірлесу, ой алмасу өтті.
Шығыс Қазақстан облысы,
Зайсан ауданы
