Сабақ желтоқсан айының басында басталып, журналистика мен филология факультетіне түскісі келгендер бірге оқыдық. Оқитын жеріміз – 28 Панфиловшылар саябағы маңындағы заң факультетінің ғимараты. Сонымен 8-9 ай тыңдаушылар санатынан табылып, 1975 жылдың жайдары жазында әйгілі университет табалдырығын студент ретінде абыроймен аттадық. Кейде өзімізше «Біз КазГУ-де бес жыл емес, алты жыл оқығанбыз» деп қалжыңға салып «кеудемізді қатты соғып» желпініп сөйлейтініміз де бар...
Дайындық бөлімінің деканы тілші ғалым, марқұм Талғат Сайрамбаев еді. Ол кісі әзілдескенді жақсы көретін.Әрдайым әлдебір қызықты жайды әсерлі әңгімелеп, өзі де қарқ-қарқ күлетін, сөйтіп, бәрімізді де мәз-мейрам ететін.
Сол тұста «Казгуград» қалашығының құрылысы қарқынды жүргізіліп жатқан-ды. Сол жетпіс төрттің желтоқсан айының аяғында ондағы алғашқы студенттер жатақханасы пайдалануға беріліп, Алматының әр түкпірін паналап жүрген дайындық бөлімінің тыңдаушылары соған «көшірілді». «Қалашықтағы бірінші біткен жатақханаға біз барып орналасқанбыз», деп те мақтанып қоямыз курстастар бас қосқанда.
Дайындық бөлімінде бізге атақты профессор, ғылым докторы Қайыржан Бекхожин, белгілі тілші-ғалым Мырзатай Серғалиев, ежелгі әдебиет профессоры Алма Қыраубаева сынды мықтылар сабақ беріп, дәріс оқыды.
Мына 1975 жылы түсірілген суретте журналистика және филология факультетіне түсуге талапкер бір топ тыңдаушы бейнеленген. Арамызда екі-үш заң факультетінен келгендер де бар. Ортада отырғандар Алма Қыраубаева (оңнан солға қарай), Қайыржан Бекхожин және журфактың оқытушысы Қоянбек Ахметов.
Суреттегілердің ішінде кейіннен белгілі қазақ ақыны атанған марқұм досымыз – Аманхан Әлім, сондай-ақ «Егемен Қазақстанда» еңбек еткен үш бірдей курстасымыз – Саясат Бейісбай, Өмір Есқали, Сатыбалды Сәуірбай да тұр.
Берікбай ҚАДЫҚОВ,
Қазақстанның Құрметті журналисі,
Қарасай ауданының Құрметті азаматы
Алматы облысы