Дүниежүзілік Аударыспақ федерациясы құрылды

Тұңғыш съезге Қазақстан, Қыр­ғыз­стан, Өзбекстан, Моңғолия, Ресей, Қы­тай, Ма­жарстан өкілдері қатысты.

Аталған жиынға қатысушылар Ат үс­­­­­тіндегі күрес (аударыспақ) дүние­жү­зі­­­лік федерацияның ресми құрыл­ғаны жө­нінде мәлімдеп, Алматы қаласы фе­де­ра­цияның штаб пәтері ретінде бе­кі­­ге­нін хабарлады. Сондай-ақ қаты­су­­шы мем­лекет өкілдері Ат үстіндегі кү­рес­ (аударыспақ) дүниежүзілік фе­де­ра­ция­сының президентігіне Қазақ­стан Рес­пуб­ликасы Аударыспақ федера­ция­сы­ның президентігіне «Аtasu Group» ком­пания­сының басшысы Марат Жұманды сайлады.

Съезге арнайы қатысқан Ұлттық спорт қауымдастығының президенті Ислам­бек Салжанов айтулы шараның ма­ңыз­ына тоқ­талды.

– Бүгін – еліміздің ұлттық спорт тари­хындағы маңызды күндердің бірі. Ұлт­тық спортымыз аударыспақ ойынын әлем­­дік дәрежеге көтерер сәт туды. Ре­сей, Қытай, Моңғолия, Қырғызстан, Өз­бекстан,  Мажарстанмен бір­лесе Аударыспақ спортын дамытып дү­ниежүзіне танытатын боламыз! Барша­ңызға белгілі, келесі жылы елімізде V Дү­ние­жүзілік Көшпелілер ойындары өтеді. Көшпелілер ұрпағы саналатын біздер бұл шараны өте жоғары деңгейде өткізуі­міз керек. Бұл мәселе Мемлекет басшысы Қасым-Жомарт Тоқаевтың да жіті назарында. Көшпелілер ойындарын тиісті дәрежеде өткізу мәселесінде Ұлттық спорт қауымдастығы өзіне қарасты федерация­лармен бірлесе жүйелі жұмыстарды бастап кетті. Бүгінгі Дүниежүзілік Аударыс­пақ федерациясының құрылуы соның дәлелі деп білемін. Осы орайда, аталған спорт­тың дамуы мен өркендеуінде тынымсыз еңбек етіп жүрген Аударыс­пақ фе­де­рациясы­ның президенті Марат Жұман мырзаға ерекше алғысымды білдіре­мін, – деді Ислам­бек Салжанов.

Өз кезегінде Ат үстіндегі күрес­ (ауда­рыспақ) дүниежүзілік федера­ция­сы­ның жаңа президенті Марат Жұман алда үлкен жұмыс күтіп тұрғанын мәлімдеді.

Бүгін баршамыз Алматының төрін­де аса маңызды шараға жиналдық. Осы маңызды басқосуға дәстүрлі ат спор­тын дә­ріптейтін елдерден келген өкіл­дер­ге, сондай-ақ Ұлттық спорт қауым­дас­тығына өз ризашылығымды біл­ді­ремін. Бү­гінгі жиынымыз қазақ елі үшін, ұлт­тық спортымыз үшін тарихи күн болады. Әлемнің алпауыт бірнеше мемле­кетімен бірлесіп Ат үстіндегі күрес дү­ниежүзілік федера­циясын құру арқылы біз ұлттық спортымызды жаһанға паш етеміз деген үлкен ­жоспарымыз бар. Бізді алда үлкен жұмыстар күтіп тұр. Болашақ­та федерацияға мүше елдермен бірлесе аталған спорттың дамып, өркендеуіне күш салатын боламыз, деді Марат Қожаханұлы.

Сондай-ақ жиын барысында бірың­ғай ойын ережелері бекітілді. Негізгі ереже­лер қазақтың ұлттық спорты аударыспақ­тан алынды. Одан бөлек, спортшылар­дың салмақ дәрежелері қабылданып, алда өтетін жарыстардың күнтізбелік жос­пары бекітілді. Халықаралық ойындарды әділ өткізу мақсатында міндетті түрде VAR (бей­­небақылау) қойылу міндеттелді.

Жиын соңында Қырғызстан өкілдері жаңа бекітілген бір­ыңғай ойын ережелері бойынша алғашқы әлем чемпионатын осы жылдың қыркү­йек айында Ыстықкөлде өткізуді ұсынды. Бұл бастаманы қатысушы елдер бір­ауыздан мақұлдады.

АЛМАТЫ