Ерлер арасындағы рейтингте еліміздің бірінші ракеткасы Александр Бублик бір саты жоғарылап, 26-орынға жайғасты. Екінші нөмірлі теннисшіміз Тимофей Скатов 134-тен 136-ға, Михаил Кукушкин 223-тен 229-ға, Бейбіт Жұқаев 242-ден 270-ке төмендеді. Бірер күн бұрын жұптық сында алғаш рет ATP 250 турнирінің чемпионы атанған Александр Недовесов 53-тен 8 саты жоғарылап, әлемнің 45-ракеткасы атанды. Бұл – оның өз карьерасындағы ең үздік көрсеткіші. Недовесов осыған дейін 48-орыннан аса алмаған еді. Ерлер арасындағы рейтингте испаниялық Карлос Алькарас көш бастап тұр. Екінші орынға сербиялық саңлақ Новак Джокович жайғасса, үздік үштікті ресейлік Даниил Медведев түйіндеген.
Әйелдер теннис қауымдастығының (WTA) жекелей сындағы рейтингінде де үздік үштік өзгеріссіз қалды. Бірінші орында әдеттегідей польшалық Ига Швёнтек тұрса, одан кейінгі орындарға беларусь Арина Соболенко және Қазақстан өкілі Елена Рыбакина жайғасқан. Ал Юлия Путинцева екі орын жоғары көтеріліп, 58-орынға жайғасты. Еліміздің жұптық сындағы үздік теннисшісі Анна Данилина 25-орында, Рыбакина – 107, Жібек Құламбаева 179-сатыда тұр.
