Шахмат • 26 Шілде, 2023

Оқушылардың әлем чемпионаты

200 рет
көрсетілді
2 мин
оқу үшін

3-8 тамыз күндері Ақтауда мектеп оқушылары арасында шахмат тарихында алғаш рет «World Schools Team Championship» жарысы өтеді. Қарт Каспийдің жағалауында ұйымдастырылатын әлем біріншілігінің басты ерекшелігі, жаһандық додаға шахмат үйірмелері мен секцияларының тәрбиеленушілері емес, шахматты ұнататын әуесқой мектеп оқушылары ғана қатыса алады.

Оқушылардың әлем чемпионаты

Әлем чемпионатында спортшылар екі жас санаты бойынша (12 және 18 жасқа дейін) бас жүлделерді сарапқа салады. Ақтауда алғаш рет жалауы желбірейтін дүниежүзілік жарысқа қазірдің өзінде әлемнің 50 мемлекетінен 300-ге жуық шахматшы қатысуға ниет білдірген. Олардың арасында Перу, Мадагаскар, Сан-Томе, Принсипи секілді елдердің өкілдері де бар екенін айта кеткен жөн. Бұл жерде төрт құрлықтың мектеп оқушылары өз мектебінің және елінің намысын қорғау үшін барын салады.

Бұл сында ел намысын 6 қалада орна­ласқан 10 мектеп өкілдері қорғайды. Атап айтар болсақ, Ақтау қаласындағы IT мектеп-лицейі мен Н.Марабаев атын­­дағы №7 мектеп-лицейі, Алматыдағы М.Ган­ди атындағы №92 мамандандырыл­ған ли­цейі, Республикалық физика-математика мек­тебі, физика-математика ба­ғытындағы Назарбаев зияткерлік мек­тебі, елордадағы №72 мектеп-ли­цейі мен Республикалық физика-мате­ма­тика мектебі, Атырау облыстық «Бі­лім-инновация» лицей-интернаты, Пав­­лодар қаласындағы дарынды бала­лар­­ға арналған №8 лицей-мектебі және Шымкент қаласындағы О.Жолдасбеков атындағы №9 IT лицейі.

Алдағы әлем біріншілігіне мектеп коман­даларының тиімді дайындалуы үшін Қазақстан шахмат федерациясы біріншілік қарсаңында оқушыларға Бурабайда арнайы оқу-жаттығу жиынын ұйымдастырады.

Ұйымдастырушылардың айтуын­ша, алдағы турнир оқушылардың шах­мат­қа деген қызығушылығын арттырып қана қоймай, командалық рухты кү­шей­туіне мүмкіндік береді. Мәселен, павло­дарлық оқушы Вадим Дерксен аяғының сынғанына қарамастан, командасын қолайсыз жағдайда қалдырмау үшін Ақтауға баруға бел буып отыр. Сондай-ақ Шымкент қаласындағы О.Жолдасбеков атындағы №9 IT лицей оқушысы Нұрислам Айнақұл мен Мексикадан келетін Рикардо Гаэль Брито Де Ла өз туған күндерін үйлерінен жырақта, чемпионат барысында өткізуге дайын екендіктерін айтқан.

Елімізде тұңғыш рет өткелі отырған оқушылар арасындағы ойлылар ойыны Халықаралық және Қазақстан шахмат федерацияларының мұрындық болуы­мен, Маңғыстау облысы әкімдігінің қол­дауымен ұйымдастырылмақ. Ал жа­рыс­тың бас серіктесі және басты демеушісі – «Freedom Holding Corp».