![Тарихи сана қалай қалыптасады?](/media/2023/07/31/tarikh.jpg)
Тарихи сана – ұлттық патриотизмнің және мемлекетшілдіктің қайнар көзі. Себебі оның ықпалымен азамат өз халқы жүріп өткен қилы кезеңдерді, сындарлы жылдарды, өткен қателіктерді, кемшіліктерді, қайшылықтарды біледі, түсінеді. Оңтайлы моральдік ахуалдың қалыптасуы, әрине, сол халықтың тарихының шыншылдық, тарихи объективтілік тұрғысынан жазылуына байланысты. Шынайы тарих болған, өткен оқиғаларды бұрмаламай, тарихи үдерістің нақты картинасын береді. Әрбір халық, әрбір азамат өз халқының, Отанының, жерінің шынайы тарихын білуге мүдделі.
Тұлғаның тарихи танымын қалыптастыру оңай шешілетін шаруа емес. Оған мектеп оқулықтары, бұқаралық ақпарат құралдары, мемлекеттік идеология, киноиндустрия, театр, музейлер, көрнекі жарнама, топонимика, әдебиет пен фольклор, айтыс өнері, т.б. қоғамдық өмірдің рухани салалары өз үлесін қосатыны сөзсіз. Рухани саланың осыншама салалары арқылы қалыптасатын ұлттық тарихи санасында шешуші қызметті тарих ғылымы атқарады. Сондықтан дұрыс, бұрмаланбаған, шыншыл тарихтың жазылуы және ұлттың игілігіне айналуы аса маңызды. Дұрыс жазылған тарих жоғарыда аталған рухани өмірдің саласының барлығының идеялық және мазмұндық арқауына айналады. Жалған, өтірік, немесе мифтенген тарих ұлтты кері кетіреді, оның дүниетанымына орны толмас олқылықтар әкеледі. Тарихи шындық – қоғамды емдейтін, оны сергітетін, оңы мен солын дұрыс тануға бастайтын жол көрсеткіш іспеттес құбылыс.
Әрине нағыз шындықты айтатын тарихты жазу тарихшыдан үлкен ізденісті, көп тер төгуді талап етеді. Оқиғаның қалай болғаны туралы деректерді, ақпараттарды, естеліктерді, соған қатысты барша әдебиетті талдап, салыстырып, қорытындылап барып, тарихшы өз ойын, пікірін айтады. Оның өзі қате болуы әбден ықтимал. Сондықтан тарихи шындық, көптеген зерттеушінің қызу тартыс-таластарынан кейін ғана айтылады, мойындалады. Әбден сарапталып, ақиқаты осылай деген пікірге көпшілік тарихшылар тоқталғаннан кейін тарихи оқиға туралы қоғамдық пікір қалыптасып, піседі.
Қазақстан сияқты үш ғасырдай отарлық езгіде болған, әсіресе бөтен халықтар миллиондап қоныстанған мемлекет халқының тарихи санасының ортақ мазмұнда тәрбиеленуі тіптен қиын. Қазақстан халқында патшалық Ресей мен большевиктік кеңес одағы ұлттық сананы емес, отарлаушы елдің тарихи санасының басымдылықтарын орнықтыруды мақсат тұтты. Қазақстан халқының санасында, дүниетанымында бұрмалану орын алды. Ұлттық құндылықтар екінші дәрежеге ысырылып, отарлаушы державаның құндылықтары бірінші кезекке шықты. Соның салдарынан қазақ халқының тарихи санасы айтарлықтай деформацияға ұшырады. Әсіресе қазақ халқына өркениетті халықтарға тән жетістіктер тек Ресей арқылы Батыстан келді деген еуроцентристік позиция елдің намысына тиеді. Қазақ басқа дамыған халықтардан үлгі алып өмір кешті деген жымысқы идеология халықтың белсенділігін төмендетті, оның бодандықта қалуына көмектесті, бостандық пен шығармашылыққа құлшынысын құрсаулады.
Сондықтан егеменді Қазақстан халқының тәуелсіз тарихи санасын тәрбиелеу мемлекеттік міндетке айналады. Соңғы онжылдықтарда ашылған жеті «алтын адам» қорымы, Ботай қорықтары негізінде ашылған қазақтардың «жылқы мәдениеті», Қазақстан жерінде жүргізілген тарихи антропологиялық зерттеулер қазақ халқының осы сайын далада бес мың жылдан астам өмір сүріп, 30-ға жуық түрлі мемлекеттілігі болғанын нақты тарихи деректер негізінде дәлелдеп отыр. Қазақ халқы да басқа дамыған елдер сияқты әлемдік өркениетке өзінің қайталанбас үлесін тигізіп, әлемдік тарихқа ықпалын жасаған мемлекеттің бірі екенін біліп отырмыз. Бодандық кезеңде осы тақырыптарды басым державалар қазаққа айтқызбай келген еді.
Қазір қазақ тарихшылары Отанымыздың шынайы тарихын жазуға талпынып жатыр. Ондағы мақсат – Ұлы даланың әлемдік тарихи үдерістегі орны мен рөліне әділ баға беру. Қазақ халқының басынан кешірген жеңістері мен жеңілістерін шындықпен жазу. Біздің қандай қателіктеріміз бен кемшіліктеріміз дамуға бөгет болды деген өзекжарды сұраққа жауап беру болмақ. Тарих ғылымының соңғы жаңалықтары мен бұрын ғылыми айналысқа енбеген ауқымды архив материалдары мен қолжазбалар, археологиялық ашылулар негізінде жазылатын тарих қазақ ұлтының келбетін толыққанды ашуға мүмкіндік берері даусыз.
Ел халқының тарихи санасын тәрбиелеудің маңыздылығына Президент Қасым-Жомарт Тоқаев ерекше назар аударып, «Ұлттық тарихи санасын нығайту өте маңызды. Барлық дамыған мемлекет өздерінің өткен жолының канондық образын қалыптастыруға ерекше назар аударады. Бұл істе ел тарихының көптомдық басылымы шешуші рөл атқарды. Тәуелсіздік жылдарында заманауи ғылыми талаптарға жауап беретін Қазақстанның көптомдық тарихын дайындаудың стратегиялық міндеті толыққанды шешілмей келді. Сондықтан «Тәуелсіздік бәрінен қымбат» атты мақаламда Қазақстан тарихының көптомдық жаңа басылымын дайындау мәселесін көтердім», деп жазды.
Бүгінде біздің тарихшылар қауымы Президент тапсырмасын іске асырып келеді. 7 томдық Қазақстан тарихы ғылыми басылымын жазуға 300-ден астам отандық және шетелдік тарихшылар тартылып отыр. Осы уақытқа дейін тарих ғылымындағы «ақтаңдақтардың» орны толтырылып, мифтерден тазаланған, түсінікті де негізді тарих Қазақстан қоғамының рухани игілігіне айналды. Жаңа ғылыми басылымда есімдері халық жадынан әділетсіз шығарылған, отаршыл империяға жақпаған ондаған тарихи тұлғалар халқымен қайта қауышпақ. Қазақ халқының тарихы әлем халықтарының ұлы көшінің құрамдас бөлшегі ретінде зерттеліп көрсетілмек.
Сайын Борбасов,
саяси ғылымдар докторы,
Ш.Уәлиханов атындағы Тарих және этнология институтының бас ғылыми қызметкері