Шекарадағы өзеннің сағасында лотос гүлдейтін 5 гектарға жуық алқап бар. Қызғылт түсті лотостың биіктігі 150 сантиметрге дейін жетеді. Су ортасында өсетін сирек гүл таңертең қауызын ашып, кешке қайта жабады. Лотос гүлдеген Қиғаш өзеніне Ақтөбе – Атырау – Ресей шекарасы бағытындағы жолмен жетуге болады. Атыраудан ара қашықтық – 300 шақырымға жуық.
Бұл гүлді вьетнамдықтар тазалықтың символы ретінде бағалайды екен. Тіпті оның емдік қасиеті барына сенеді. Әсіресе тұқымындағы ақуыз бүйрек пен көкбауыр, жүрек ауруы мен ұйқысыздықты емдеуге қолданылады.
Жақында осындай ерекшелігі бар лотос өсетін алқап суретшілердің туындысына арқау болды. Атырау облыстық мәдениет, тілдерді дамыту және архив ісі басқармасының басшысы Әбіл Жоламановтың айтуынша, «Су бетіндегі сұлулық» планэрі алғаш рет ұйымдастырылып отыр. Оған Алматы, Қызылорда, Ақтөбе және Атыраудан 10 суретші қатысты.
«Республикалық планэрді өткізу кезінде бірнеше мақсат көзделді. Біріншіден, Атырау облысының Ресеймен шекарасындағы Қиғаш өзенінде өсетін, «Қызыл кітапқа» енген лотос гүлін кенеп бетіне түсіру. Екіншіден, су бетіндегі сұлулықты бояулар үндестігімен бейнелеп, ішкі туризмді дамытуға үлес қосу. Үшіншіден, туған өлкеге сүйіспеншілікті арттыру. Төрт өңірден қатысқан суретшілер бір-бірімен тәжірибе алмасты», дейді Әбіл Жоламанов.
Суретшілер Қиғаш және Шарон өзенінің аңғарындағы табиғат көрінісін, су бетіндегі сұлулықты кенепке бейнелелеген композиция жасады. Суретшілер одағының мүшесі, халықаралық және республикалық көрмелерге қатысқан алматылық қылқалам шебері Максим Ведерниковтің айтуынша, лотос алқабы – туристік брендке сұранып тұрған мекен.
«Қазақстанда туристерді қызықтыратын табиғи орындар көп. Бірақ су үстінде өсіп тұрған лотос секілді алқапты алғаш рет көрдім. Шын мәнінде су бетіндегі сұлулықты көзбен көру керек», дейді Максим Ведерников.
Қызылордалық суретші Дулат Айтбаев Ш.Сариев атындағы көркемсурет және қолданбалы сәндік өнер музейіне ерекше туындысын ұсынды. Ол лотос гүлін салуға күрішті пайдаланған. Планэрге қатысқан суретшілер лотос алқабын бейнелеген 21 туындысын музейдің қорына тапсырды. Ал суретшілерге 250 мың теңгенің стипендиясы берілді.
