Жалпы алғанда Абай облысында балаларға арналған 12 сауықтыру лагері бар.
– Біздің лагерь 15 маусымда ашылды. 6 маусым бойынша мұнда демалуға 620 бала қамтылып отыр. 600 бала «Қазақстан халқына» қорының есебінен демалады. 20 бала мемлекеттік қызмет көрсету мақсаты бойынша келеді. Барлығының да уақытын қызықты өткізуге баса мән береміз. Тәулігіне алты мезгіл тамақтанады, екі рет емдік қасиеті бар Алакөлге шомылады. Барлығы жіті қадағалауымызда. Демалтып қана қоймай, патриоттық іс-шаралар, әртүрлі өнер сайыстарын ұйымдастырамыз. Он күндік маусымның әрқайсысы бойынша 120 бала демалып қайтады. Қазіргі төртінші маусымда Бородулиха, Бесқарағай, Аягөз және Үржар аудандарының балалары жүр, – дейді «Үржарайым» сауықтыру лагерінің аға тәлімгері Дина Досанқызы.
Үржар ауданы Ақжар ауылынан келген 8-сынып оқушысы Гүлнұр Рақышева осы лагерьге келгеніне ерек-
ше қуанышты.
– Әр күніміз қызықты өтіп жатыр деп айтуға болады. Кеше волейбол ойнасақ, бүгін дойбы ойнамақпыз. Өзім биге, ән айтуға жақынмын. Кешке «Екі жұлдыз» байқауы өтеді. Соған тәлімгеріммен бірге «Бетперде» әнімен қатысуға ынталанып отырмын, – дейді жүзінен қуаныштың лебі ескен Гүлнұр.
Осынау сауықтыру лагерінде 16 демалыс орны қамтылған. Әрқайсында 12 бала бір тәлімгерімен жайғасқан. Балалардың қызықты да алаңсыз демалуына қауіпсіздік, сақтық шаралары бақылауға алынған.
