Бүгінде Талдықорғанның іргесіндегі Көктал ауылында орналасқан шеберхана өз жұмысымен көпшілікті қуантып келеді. Былтыр ғана ашылған шеберхана аз уақытта жетісулықтардың көз қуанышына айналып үлгерген. Тұтынушылар үшін бағасы да тиімді, ал тапсырыс берген адамның ешбірі өкінген емес. Бәрі мұқият тігіліп, сұранысқа сай қызмет көрсетеді.
«Шеберхана ашу – анамыздың идеясы. Анамыздың бастауымен іске кіріскенбіз. Отбасылық бір іс бастауды жоспарладық және ол қазір жемісті болып жатыр. Бастапқыда тек көрпемен айналысамыз деген ой болған, артынша тігу шеберханасын аштық. Қазір қыз жасауы, ескі көрпені жаңарту, төр көрпелер, матрастар, балаларға арналған көрпелер тігумен айналысамыз. Бүгінде тек Талдықорғаннан емес, жан-жақтан тапсырыс көп түседі. Анамыз жақында бақиға аттанды. Анамыз бастап кеткен істі мұра ретінде қарап, бағалап, жұмысымызды адал және тиянақты жалғастырып келеміз», дейді жас шебер.
Салтанаттың анамыз деп отырғаны – енесі Алмагүл Оңғарбаева. Өмірінің соңғы жылдарында өңірдегі «Атамекен» кәсіпкерлер палатасында адами капиталды дамыту бөлімінің басшысы болған. Ал Салтанат кіші ұлы Әділеттің жары.
Аталған шеберханада жүн жуу, жүн түтетін, көрпе сыру машинасы, матрас тігетін, кескіндейтін лазер аппараты және тігін машинасы бар. Барлық құрылғыны Қытайдан арнайы тапсырыспен алған. Жаһандық індеттің салдарынан кейбір техникалық жабдықтар кешігіп жеткен екен. Жақын арада жастықты қайта өңдеу машинасын алуды жоспарлап отыр. Ал маталарды Алматыдан алады. Тұтынушылардың сұрауымен және жеке шеберлердің тәжірибесіне сүйеніп әртүрлі сападағы маталармен жұмыс істейді.
«Көктем мен жаз айларында тапсырыс күрт өседі. Той-томалақ көп, әсіресе жаңадан отау құрған жастар түрлі нұсқада көрпе, жастық тігуімізді сұрайды. Дегенмен шүкір, жұмысымыз жылдың барлық мезгілінде де тоқтаған емес. Үйлену маусымы бәсеңдеген соң көбінесе көрпелерді қайта өңдеумен айналысамыз. Ерінбесеңіз іс көп, тек соның жолын таба білу қажет», дейді С.Зәуренбек.
Шыны керек, бізді қызықтырған ене мен келін арасындағы ыстық байланыс. Қазақтың дәстүрлі ұғымында ене – үлкен мектеп. Мұны жас келін жақсы бағамдаған. Тігін шеберханасын бірлесіп ашу арқылы марқұм енесінен көп іс үйренгенін жасырмайды. Айтқан ақылы, көрсеткен өнегесі жадында. Игілікті істі бүгінде үзбей жалғастырып, абырой биігінде отыр. Тіпті келешекте шеберхананы кеңейтіп, одан әрі дамытуға күш салмақ.
«Енем анамдай болып кеткен ақылды, парасатты, еңбекқор жан еді. Шыны керек, осыған дейін тігін тігу жағын білмейтінмін, енемнің жанында жүріп үйрендім. Бүгінде бұл іске үлкен махаббатпен кірісемін. Алға қойған мақсатымыз көп. Сатылым айналымын өсірсек, жұмыс орындарын көбейтсек, өзіміздің дүкенімізді ашып, таза экологиялық тауарымызды қазақы нақышта шетелдерге экспорттап, «Мақта қыз» өнімдерін брендке айналдырсақ деген арманымыз бар. Бастағанда арман еді, арманымыз мақсатқа айналды. Алда жұмыс көп, тек еңбектенуіміз қажет», дейді кәсіпкер келін ағынан жарылып.
Жас кәсіпкер мемлекеттің шағын және орта бизнесті дамытуға арналған жобалары аясында құрылғыларымызды төменгі пайызбен несиеге алған. Қосымша жұмыспен қамту орталығы жұмысшыларды жалақымен демеп отырады. Бұл тұрғыда мемлекеттік жобаларға өз алғысын білдіріп жатыр. Қазір тауарларға барынша жарнама жасап, басқа өңірлерге де сатуды ойластырып жүр.
Иә, қалай болғанда да ерінбеген адам еңбекпен биікке шығады. Жетісуда мұндай жастар көп. Түрлі салада өз бағын сынап жатқандарға облыс әкімдігі барынша жәрдемдесіп келеді. Мәселен, алғаш рет жастардың бастамаларын қолдау мақсатында «Тәуелсіздік ұрпақтары» грантына байқау жарияланды. Мәдениет, ғылым, бизнес, медиа және IT салалары бойынша 100-ге жуық жоба қабылданып, соның ішінде 10 жоба қолдау тапты. Күні кеше «Jetisy jastary» орталығында сол жалынды жастарға қайтарымсыз 3 миллион теңгелік сертификат табысталды. Бұл өңірге Салтанат секілді іскер тағы да 10 жас кәсіпкер қосылды деген сөз.
Жетісу облысы
