«59 жаңа автобус сатып алдық. Олар климатты бақылау, бейнебақылау жүйелерімен және ақылды камералармен жабдықталған. Мысалы, егер жүргізуші шаршаса, қалғып кетсе, темекі шексе немесе телефонмен сөйлессе, бұл камералар бәрін түсіріп, ереже талабы бұзылғаны туралы белгі береді. Осылайша, нақты уақыт режімінде барлығын қадағалап отыруға техникалық мүмкіндігіміз бар», дейді №5 автобус паркінің бас директоры Нұрлан Елшібаев.
Сонымен қатар автобустар жылдамдықты шектейтін датчиктермен, жүріп-тұруы қиын жолаушыларға арналған көтергіштермен жабдықталған. Олардың клиренсі жоғары, жүргізушіге қоңырау шалу түймесі бар. Автобустар «Еуро-5» экологиялық стандарты талаптарына толық жауап береді.
Облыс әкімі Ермағанбет Бөлекпаев автопаркке арнайы барып, ондағы басшылықпен кездесті. Зауыттан жаңа алынған автобустарды көрді. Екінші кезектегі міндет қоғамдық көліктің жұмыс кестесін ұзарту екенін атап өтті.
«Осымен үшінші жыл қоғамдық көлікті жаңартумен тұрақты түрде айналысып келеміз. Onay электронды билеттеу жүйесін енгіздік. Қалалық маршруттарда ғана емес, қала маңындағы маршруттарда да жол жүруді екі есеге жуық арзандатуға мүмкіндік жасадық. 18 жасқа дейінгі балаларды тегін жол жүретін қылдық. Енді Пришахтинск тұрғындарының үйіне жетуі үшін автобустардың жұмыс уақытын 21.00-ге дейін ұзарту мәселесі ғана қалды. Қалааралық автобустарды да жаңарту көзделген. Жыл соңына дейін барлығы 33 көлік сатып аламыз, сегізі ең сұранысқа ие бағыттардың бірі «Қарағанды – Теміртау» бағытына шығады. Жақын арада Балқаш қаласының да автобус паркі жаңарады. №5 автопарктің иелері сол жерде де жұмыс істейді», деді әкім.
Қазір автопарк техникаларының 80 пайызы жаңартылған. Мұндай бағыттағы жұмыстар әлі жалғаса береді.
Қарағанды облысы
