Аймақтар • 03 Қыркүйек, 2023

Кенді өлке, келісті өлең...

234 рет
көрсетілді
2 мин
оқу үшін

Қарағандыда кеншілердің даңқын өлеңмен аспандатқан «Кенді өлке – Қарағанды» атты республикалық мүшәйра дүркіреп өтті. Өлең додасын Қарағанды қаласының әкімдігі ұйымдастырды. Жүлдегерлер Кеншілер шаһарының орталық саябағындағы сахнада марапатталып, жырларын оқыды.

Кенді өлке, келісті өлең...

Мүшәйраға республика бойынша 18 бен 45 жас аралығындағы қырықтан аса ақын өлең жолдаған. Қазылардың ұйғарымымен осылар­дың ішінен 9 ақын іріктеліп, жүл­деге лайық деп танылды. Алқа құрамында ақын, Мем­лекеттік Абай атындағы сыйлықтың лауреаты Ға­лым Жайлыбай, ақын Бауыр­жан Бабажанұлы, жазушы, этно­граф Төрехан Майбас, ақын, Қа­зақстан Жазушылар одағы облыстық филиа­лының төрағасы Жанат Жаңқаш болды. Ақын, Мем­лекеттік Абай атындағы сыйлықтың лауреаты Серік Ақсұңқарұлы төрағалық етті.

Мүшәйраның шарты бойынша ақындар Қарағандыға, кеншілерге өлең арнады. Ақын, Қазақстан Жазушылар одағы облыстық филиа­лының төрағасы Жанат Жаңқашұлы бұл жолғы мү­шәйраға түскен өлеңдердің дең­гейі жоғары екенін атап өтті.

 – Бұл жолы екі ақынға бірінші орынды беруді ұйғардық. Өйткені келіп түскен өлеңдердің деңгейі жоғары. Жақсы өлеңге жақсы жүлде бергенді жөн санадық. Өз бағасын алуға тиіс. Жүлдегерлерді анықтау оңай болмады. Мүшәйраны өткізудегі мақсат – кенді өлке Қарағандының топырағында өткен тарихи оқиғалар мен тұлғалар тағылымын дәріптеу, өлең өзегіне айналдыру һәм кеншілер өмірін жырға қосып, еңбек жолын насихаттау, – дейді Ж.Жаңқашұлы.

Бұл мүшәйрада екі ақынға бірінші орын берілді. Атырау қала­сынан келген Әлия Дәулетбаева мен те­міртаулық Әділет Шөпенге бұйыр­ды. Қос қаламгерге 700 мың тең­генің сертификаты табысталды. Екінші орын ақын, «Egemen Qazaqstan» газетінің тілшісі Жәнібек Әлиманға бұйырды. Үшінші орынды Астанадан келген Ұларбек Дә­лейұлы мен алматылық Асы­лан Тілеген бөлісті. Ынта­лан­дыру сый­лығына Салтанат Қайыр­бек, Ерік Нарын, Дәулет Жа­дырасын, Таң­сәуле Әгенқызы ие болды.

Әуелде ақындар үшін 6 жүлде ғана тағайындалыпты. Қазылардың шешімімен тағы қосымша 3 жүлде қосылған. Әкімдіктен бөлінген қара­жаттан бөлек демеушілерден де қолдау болған. Ұйымдастырушылар Нұргелді Омархановқа, Бекзат Қо­марұлына және «Exim Artis» компаниясына алғыс білдірді.

Кеш барысында Арқаның танымал әншілері Медет Осатаев, Арайлым Жүкенова, Саян Бөдес, Нияз Қанафия, Нұрбек Шабан ән­нен шашу шашты.

 

Қарағанды облысы