Жамбыл ауданына қарасты Шоқай ауылындағы №3 орта мектептің жаңа ғимараты пайдалануға берілді. Осылайша, ауылдықтарды алаңдатқан өзекті мәселе жаңа оқу жылында сәтімен шешілді. 150 оқушыға арналған жаңа нысанда оқушылардың сапалы білім алуына барлық мүмкіндік қарастырылған.
– Бүгінде өңірдегі білім нысандарының материалдық-техникалық базасын нығайтуға баса мән беріп отырмыз. Облыс орталығынан бөлек, шалғайдағы елді мекендерде де жаңа нысандар бой көтеріп жатыр. Апатты жағдайдағы білім ошақтары мен үш ауысымда оқитын және орын тапшылығы бар мектептердің мәселесі жыл өткен сайын шешімін тауып келеді. Атқарылған нақты жұмыстардың нәтижесінде салада жеткен жетістіктер аз емес. Биыл ағартушы салаға 284,8 млрд теңге қарастырылды. Бұл облыс бюджетінің жартысынан жоғары. Сондай-ақ қазіргі таңда 25 білім нысанының құрылысы жүргізіліп жатыр. Жыл соңына дейін 9 мектеп пен 5 мектептің жапсарлас құрылысы аяқталады. Ал 11 нысан келесі жылы пайдалануға беріледі. Шоқай ауылының оқушылары жаңа мектептің табалдырығын аттап отыр. Осылайша, ауылдағы орын тапшылығы бар №3 мектептің мәселесі толықтай шешілді. Енді балалар заманауи талапқа сай жабдықталған үлкен білім ордасында білім алады, – деді білім ордасының ашылу салтанатында облыс әкімінің бірінші орынбасары Нұржан Календеров.
Ол балалардың алаңсыз білім алуы үшін мемлекет тарапынан көрсетілетін қолдау жалғаса беретінін тілге тиек етіп, өңір басшысының атынан 10 ноутбук сыйлады. Ауыл азаматтарының атынан сөз алған Болат Қожабеков тұрғындардың өтінішін дер кезінде орындаған жергілікті атқарушы билікке алғыс айтты.
Ғимарат құрылысын жүргізген «Тараз Строй-2004» ЖШС өкілі Қуат Баққараев жаңа мектептің символикалық кілтін мектеп директорына табыстады. Жаңа мектеп спортзалы, мәжіліс залы, шеберхана, тігін бөлмесі, роботтехника секілді өзге де қажетті кабинеттермен жабдықталған.
Жамбыл облысы,
Жамбыл ауданы
