Мектеп • 05 Қыркүйек, 2023

Жетісудағы жаңа мектептер

219 рет
көрсетілді
6 мин
оқу үшін

Көксуда екі жаңа мектеп ашылса, Қараталда гуманитарлық кол­ледж пайдалануға берілді. Одан бөлек, күрделі жөндеуден өткен бірнеше білім ордасы оқу­шы­ларды қабылдады. Жар­ты ғасырдан астам жөндеу көрме­ген білім шаңырақтары алыстан көз тартады, заман талабына сай жаб­дықталған. Ең бастысы, оқу­шы­лар мен ата-аналар дән риза.

Жетісудағы жаңа мектептер

Қаратал ауданына қарасты К.Тоқаев орта мектебі мен Кәлпе орта мектебі күрделі жөндеу жұмыстарынан кейін оқушылармен қайта табысып отыр. Бірнеше ай есігі жабық тұрған оқу ордасы Білім күнінде шәкірттеріне қуаныш сыйлады. Одан кейін гуманитарлық колледж ашылып, жас талапкерлерді қабылдады.

К.Тоқаев орта мектебінің жобалық қуаттылығы 640 орындық, 900 бала білім алады. 2022 жылы 200 орындық қосымша ғимарат салынған. Биыл К.Тоқаев қоры арқылы «BI Group» компаниясы негізгі ғимаратқа толық жөндеу жұмыстарын жүргізіп, материалдық-техникалық тұрғыдан толық жаңартылды. Замануи пәндік кабинеттер, асхана, концерттік зал және спорт залы жасақталды. Со­ны­мен қатар кітапхана, тренажер залы, мультимедиалық кабинет, IT кабинет, медиатека кабинеттерімен жабдықталды. Жаңа оқу жылында 905 оқушы, оның ішінде 1-сыныпқа 74 бүлдіршін мектеп табалдырығын аттады.

Ал колледж құрылысы өткен қараша айынан бастап жүргізілген. 100 талапкерге арналған білім мекемесінің 30 орындық жатақханасы бар. Құрылыстың жалпы құны 1,641 млрд теңгені құрады. Колледж іші кітапхана, тренажер, спорт және концерттік залдармен жабдық­тал­ған. Биылғы оқу жылында «Мектепке дейінгі тәрбие және оқыту», «Бастауыш білім беру педагогикасы мен әдістемесі» мамандықтары бойынша 50 білім алушы, қабылданды.

Ал Кәлпе ауылындағы мектептің күр­делі жөндеу жұмыстарына 1,6 млрд теңгеге жуық қаржы жұмсалған. Мектепте 234 оқушы, 30 мұғалім бар. Өткен оқу жылындағы білім сапасын бақылау көрсеткіші 65 пайызды құраған. Жөндеу жұмыстары кезінде балалар көрші ауылдағы мектепте білім алды. Күрделі жөндеу аясында материалдық-техникалық базасын жаңартуға бюджеттен 101 млн теңге қарастырылып, қажетті заттар толық сатып алынған.

Жалпы, Кәлпе орта мектебінің іргесі 1970 жылы қаланған, жоба­лық қуаттылығы – 960 орын. Мектеп ғи­ма­ратын тиімді пайдалану, бала­лар­дың бос уақытын дұрыс ұйымдастыру мақсатында қосымша 50 орындық шағын орталық (толық мерзімдік) және 640 балаға арналған балалар шығармашылық орталығы ашылды. Орталық музыка, сурет және компьютерлік графика сабақтарына қажет заттармен толық жабдықталған. Мектепте асхана, спорт және акт залдары, жеке спорт алаңдары бар стадион орналасқан. Сонымен қатар мектеп аумағында 50 орындық балабақша да пайдалануға берілді. Өткен оқу жылында жаңа модификациялы физика, химия, биология кабинеттері сатып алынып, мектеп кітапханасы модернизациядан өткен екен.

Ал Көксу ауданына қарасты Бес­қай­нар орта мектебі жүзден астам оқу­шы қабылдай алады. Мектепке дейінгі шағын орталығы бар жаңа оқу ордасы заманауи жиһаздармен, интерак­тивті панельдермен қамтамасыз етілген. Одан бөлек, оқу кабинеттері барлық қажетті құрал-жабдықтармен жабдықталған. Мектеп аумағы абаттандырылған, футбол стадионы, хоккей алаңы, воркаут алаңы, балаларға арналған ойын алаңы бар. Қауіпсіздік мақсатында бейне­ба­қылау орнатылған. Білім ордасындағы 12 сыныптық жинақта 140 оқушы оқиды.

Қазақстанның 10 жылдығы ауылында 25 орындық шағын орталығы бар 120 орындық орта мектептің құрылысы аяқталып, қолданысқа берілді. Мектеп­тің ескі ғимаратында небәрі 7 оқу каби­не­ті болған еді. Мерекелік іс-шара­лар өтетін акт және спорт залдары бол­маған. Қазір бұл мәселе шешімін тауып, материалдық-техникалық базасы толығымен жаңартылды. Ғимарат сырты толық абаттандырылып, футбол стадионымен, жаттығу алаңдарымен және ойын бөлмесімен толықты. Мектепте 81 оқушы оқиды.

Сонымен қатар Кербұлақ ауданына қарасты Сарыөзек ауылындағы №49 мек­теп күрделі жөндеуден өтті. Құрылысы өткен жылдың маусым айында басталған 780 орындық мектепке 727 млн теңгеге жуық қаражат бөлінген еді. Мектепте 1-11-сынып аралығында 878 оқушы білім алады, 48 сынып жинағы құрылған.

Айта кетейік, биыл Жетісу өңірінде 16 білім беру нысанының құрылы­сы жүр­гізіліп жатыр. 10 нысанды пайда­ла­нуға беру жоспарланса, қалғаны ел игілігіне берілді. Бүгінде оның үшеуі мерзімінен бұрын ашылды. Облыс бо­йынша 69 елді мекеннен 1766 оқушы тасымалданады. Биыл 604,2 млн теңгеге қосымша 12 автобус сатып алу жоспарланса, оның 7 автобусы жуырда білім беру ұйымдарына берілді. Қалған 5 автобус жыл соңына дейін жеткізіледі.

Облыстық білім басқармасының мәлі­метінше, жалпыға бірдей білім беру қорынан жекелеген санаттағы 23 486 оқу­шыны мектеп формасымен және оқу-әдістемелік құралдармен қамтамасыз етуге 1 млрд теңгеге жуық қаражат бө­лін­ген. Сондай-ақ жаңа оқу жылында 52 мың бастауыш сынып оқушысы те­гін ыстық тамақпен қамтылады. Бұл мақ­сат­қа жергілікті бюджеттен 1,7 млрд теңге қарастырылып отыр. Өңірде 130 мың оқушы оқиды. Ал бірінші сыныпқа 13 500 оқушы қадам басты.

 

Жетісу облысы