Жастар • 06 Қыркүйек, 2023

Түлектің тартуы

198 рет
көрсетілді
3 мин
оқу үшін

Л.Н.Гумилев атындағы Еуразия ұлттық универ­ситетінің бірнеше студенті арнайы грантқа ие болды. Іріктелген ізденушілерге білімін тегін жалғастыруға сол университеттің түлегі мүмкіндік сыйлап отыр.

Түлектің тартуы

Алты студентке жылдық оқу грантын табыс еткен тү­лек – Ержан Тастамбеков. Ғы­лым және жоғары білім ми­нис­трлігі таратқан ақпаратқа сүйенсек, жылдық оқу грантына үміткерлерді іріктеу сту­денттердің әлеуметтік жағ­дайы­на, оқу үлгеріміне және ҰБТ-да жиналған ұпай санына қарай жүргізілген. Универ­ситет проректоры Думан Айт­мағамбетов, оқу ордасының тү­легі, Zebra Coffee кофеханалар желісінің негізін қалаушы Ержан Тастамбеков, ENU Endowment Fund өкілдері 1-курс студенттерімен әңгімелесу өткі­зіпті. Нәтижесінде, кәсіпкер 2023-2024 оқу жылында фило­ло­гия, сәулет және құры­лыс, әлеуметтік ғылымдар факуль­тетінің дарынды студенттеріне қолдау көрсететін болды.

– Грант алушыларды ірік­­теу арнайы критерий­лер бо­йынша жүргізілді. Биыл мем­лекеттік грантқа бір-екі ұпай жет­пеген және әкімдік­тер мен түрлі қордың грант­тарын иеленбеген, сон­дай-ақ университеттегі оқу ақы­сын төлеуге мүмкіндігі төмен студенттердің анкеталары қаралды. Әрине, таңдау кезінде біз дарынды жастардың әлеуметтік жағдайын да ескер­дік. Ең алдымен, қолдау мен көмекке мұқтаж немесе қиын жағдайға тап болғандарға ба­сым­дық берілді. Белсенді студенттерге де грант бөлінді, – деді Е.Тастамбеков.

Әмірхан Шегебаев ҰБТ-дан 112 ұпай жинағанымен, мем­лекеттік грантқа қол жеткізе алмады. Дарынды спортшы уни­верситет түлегінің қол­дауы­­мен биылғы оқу жылын­да Әлеу­меттік ғылымдар факуль­тетінде тегін оқу мүмкіндігіне ие болды. Әмірхан – спорт ше­берлігіне кандидат. Шайбалы хоккейден жастар және мектеп оқушылары арасында ел чемпионаттарына, допты хоккейден қысқы гимна­зиадаға қатысқан.

– Әңгімелесу барысында өзім­нің спортқа деген құш­тар­­лығым ерекше екенін айттым. Оқуды бітіргенде спорт­тың беделі мен деңгейін арт­тыруға күш салғым келе­ді. Грант алғаныма өте қуа­ныш­­тымын және кәсіпкер Ер­жан Тастамбеков пен ENU Endowment Fund қорына қолдау көрсеткені үшін алғыс айтамын, – дейді Әмірхан.

Ал Ақтөбеден келген Ай­ла­на Сапарғали адам­дардың өмірлік мәселелерін шешуге көмектескісі келеді. Өйткені ол – болашақ психолог.

– Шынымды айтсам, әңгіме­лесуге қатысқаныммен, дәл мұндай бір ғажайып күткен жоқ едім. Грант иегері болғанымды хабарлағанда сене алмадым. Бұл маған да, анам үшін де күтпеген, керемет жаңалық болды. Бала кезімде Астанаға жиі келіп, Еуразия университетінің ғимаратына қарап, осы беделді оқу ордасында білім алуды армандайтынмын. Сапалы білім алып, сұранысқа ие маман болып, болашақта адамдардың өмір­лік мәселелерін шешуге кө­мек­тескім келеді, – дейді Айлана.

Іріктелген ізденушілердің қатарында Жамбыл облысы Қара­тау қаласынан келген Аружан Төрегелді мен астаналық Сымбат Базарбай да бар. Екеуі де – филология факультетінің студенті. Жылдық грант иелері меценат пен университет сенімін ақтауға тырысамыз дейді.

Еске сала кетейік, 2022 жылы университет түлектерінің бастамасымен ENU Endowment Fund құрылған болатын. Қор арқылы дарынды және мұқтаж студенттерге қолдау көрсетіледі.