Футбол • 19 Қыркүйек, 2023

Елімізде ең көп жалақы алған футболшылар

189 рет
көрсетілді
1 мин
оқу үшін

Отандық «Дядя Ваня» деп аталатын телеграмм-арна Қазақстан чемпиона­тының тарихында ең көп жалақы алған футболшылардың тізімін жариялады.

Елімізде ең көп жалақы алған футболшылар

Бай-қуаттылардың тізімін Жерар Гоу бастап тұр. Кот-д’Ивуардан келген шабуылшының 2014-2017 жылдары Алматының «Қайратында» өнер көрсеткен кездегі бір айлық жалақысы 160,5 мың долларды құраған екен. «Қай­раттың» сапында ол 102 рет жасыл алаң­ға шығып, 80 гол соқты. Кейіннен Гоу Қытайдың «Бейцзин Энтерпрайзес» және Түркияның «Касымпашасында» ойнады. 2022 жылы қайта Қазақстанға оралып, «Ақтөбенің» жейдесін киді. Қазір африкалық футболшы өз мансабын аяқтады.

Екінші орында – Андрей Аршавин. Ресей футболының жұлдызы айына 120 мың доллар жалақы алды. 2016-2018 жылдары «Шава» 84 матчта 24 мәрте мергендік танытты. Үшінші сатыға Вагнер Лав жайғасты. Кезінде Бразилияның жас­тар және ұлттық құрамасы сапында ойнаған шабуылшы 2020-2021 жылдары Қазақстан Премьер-лигасында 35 кездесу өткізіп, 14 рет нысананы дәл көздеді. Лавтың жалақысы – 100 мың доллар. Бұл ойыншылардың барлығы да «Қайраттың» намысын қорғады.

Сондай-ақ ең көп жалақы алғандардың қатарында Анатолий Тимощук (Украина, «Қайрат». Айлығы – 91,7 мың доллар), Маркос Пиззелли (Армения, «Ақтөбе». $75 мың), Данило Неко (Бразилия, «Ақтөбе». $71,7 мың), Андерсон Сантана (Бразилия, «Ақтөбе». $61 мың), Данило Сирино (Бразилия, «Ақтөбе». $61 мың), Марин Томасов (Хорватия, «Астана». $60 мың), Жуниор Кабананга (Конго, «Астана». $60 мың) және Бауыржан Исламхан (Қазақстан, «Астана». $60 мың) сынды аяқдоп шеберлері бар.