Қоғам • 20 Қыркүйек, 2023

Берекелі жәрмеңке

177 рет
көрсетілді
2 мин
оқу үшін

Облыс орталығында аудандардың мәдени күндерін өткізу дәстүрі қайта жанданды. Әр аудан аптаның әр сенбісі сайын жәрмеңке ұйымдастырып, өскемендіктерге өз өнімдерін ұсынады, өнерлерін ортаға салады. Бұл жолы ат арытып келген Зайсан ауданы еді.

Берекелі жәрмеңке

Суретті түсірген – автор

Әуелі «Ертіс концерт» залында зайсандық өнерпаз­дардың қатысуымен «Туған жер – алтын бесігім» атты гала концерт өтті. Мәдени шараға ақын Ұлықбек Есдәулет, күміс көмей әнші Қанат, Айткүл Құдайбергеновтер сынды Зайсан өңірінің өнерлі тумалары қатысты. Дүркіреп өткен концерттен кейінгі мә­дени күн «Fresh Market» сауда орталығының ауласындағы жәрмеңкеге ұласты. Мұнда да әншілер әннен шашу шашып, бишілері мың бұрала би биледі. Спорттық сайыстар да өтті. Айта кетерлігі, жәрмеңкеде ауылшаруашылық өнімдері халыққа қолжетімді бағада сатылды. Жылқы етінің келісі 2 500 теңгеден сатылса, сиыр еті 2 300 теңгеден ұсы­нылды. Ал қой еті 2 200 тең­геге баға­лан­ды. Одан өзге де Зай­сан­ның бренд өнім­дері сө­релерге қойылды. Бә­рінен бұ­рын ха­лықты қызық­тырғаны же­міс-жидек пен көкөністерден жа­салған ерекше композиция еді.

– Ұмытылып кеткен осын­­­дай мерекелердің қай­та жаңғырып, жалғасып жат­­қа­нына қуаныштымын. Бұл дәстүрдің бұғанасы бекіп, қанатын кеңге жайып, өнер­паздардың өрлеуіне жол ашады деп ойлаймын. Жәрмеңкеге өздерінің ақ адал өнімдерін әкеліп, ойдағы ел қырдағы елмен араласып жатқанын көру бір мәртебе, – дейді ақын Ұлықбек Есдәулет.

Сонымен қатар Зайсанның мәдени күндері аясында арбатта да спорттық жарыстар ұй­ымдастырылған. Садақ атудан бірінші орынға Ерхан есімді жігіт шықса, бір қап картоп көтеруде 9-сынып оқушысы Жас­мин ешкімге дес бермеді. Түрлі спорттық сайыстарға белсене қатысқандарға картоп, ұн, қант тарту етілді.

 

Шығыс Қазақстан облысы