Қоғам • 20 Қыркүйек, 2023

Қабдеш Жұмаділов турнирі

191 рет
көрсетілді
3 мин
оқу үшін

Өскеменде Қазақстанның халық жазушысы, Мемлекеттік сыйлықтың иегері Қабдеш Жұмаділовті еске алуға арналған мемлекеттік қызмет, еңбек және спорт ардагерлері ара­сын­дағы ХХХ халықаралық бильярд турнирі мәресіне жетті.

Қабдеш Жұмаділов турнирі

Бұл дүбірлі жарыс өт­кен жылы да өтіп, оны ұйым­дас­тырушы, спорт жанашыры, Қазақстан бильярд федерация­сы Шы­ғыс Қазақстан облыстық фи­лиа­лының директоры Серік Ақтанов келешекте Қабдеш атындағы турнирдің ауқымын кеңейтіп, халықаралық дә­ре­жеде өткізуге уәде берген еді.

Серік мырза уәдесінде тұр­ды. Бұл жолғы бильярд додасына Қыр­ғызстаннан, Ре­сейден, Қазақ­стан­ның 8 об­лысы мен Астана, Алма­ты қалаларынан 50-63 жас­тағылар арасында – 14, ал 63 жастан жоғарылар арасында – 9, барлығы – 23 команда қатысып, жарыс көрігін қыз­дырды. Турнирді өткізуге Шығыс Қазақстан облыстық денешынықтыру және спорт бас­қармасы, Түркі әлемінің жазушылар одағы, Қазақстан Жазушылар одағы, Қазақстан бильярд спорты федерация­сы, Әлем қырандары және Шығыс бильярдшылар лигасы мен Қабдеш Жұмаділов атындағы қоғамдық қор белсене араласты. Турнирге Қабдеш ағаның ұлы Арман Қабдешұлы, Өс­кемен қаласының әкімі Жақ­сылық Омар, Қабдеш ағаның жақын досы, інісі, академик Ұлықпан Сыдықов, жазушымен жақсы қарым-қатынаста болған зайсандық белгілі қаламгер Қалибек Алтыбаев, Ұлық­бек Есдәулет, Сәдібек Тү­гел, Ғалым Қалибекұлы, бас­қа да зиялы азаматтар қатысты.

50-63 жасқа дейінгілер арасындағы командалық жарыста құрамында Нұр­жан Жи­ен­баев, (капитан), Ринат Алимов, Владислав Ли, Мұ­қан Бай­мұратов, Адалбек Шы­қылаев, Бейсен Байғалиев сияқты шебер ойыншылар бар «Асау Ертіс-1» командасының екпініне ешкім шақ келмеді. Олар бірінші орынды талассыз жеңіп алды. Екінші және үшінші орынды Ал­матының НАП, Қарағандының «Сары­арқа» командасы иеленді. 63 жастан жоғары жастағылар арасындағы жарыс та тартыс­ты өтті. Нәтижесінде, Ал­ма­ты­дан келген «Бір­лік» коман­дасының шеберлері жеңімпаз атанды. Астананың «Ауыл ұландары», Қарағандының «Са­рыарқа» командалары екін­ші және үшінші орындарды бөлісті.

Қабдеш Жұмаділовті еске алуға арналған турнирдің тәр­биелік мәні зор болса керек. Бүгіндері Өске­мен қаласында бильярд спортына елік­теген балалар секцияларға жаппай жазылып жатыр. Он мыңнан астам адам бильярд спорты десе ішкен асын жерге қояды. Соңғы жылдары ғана Серік Ақтановтың мұ­рындық болуымен Азия бірін­шілігі, басқа да бірнеше халық­ара­лық жарыс өтті. Ал­дағы уа­қытта да бильярд спор­ты­ның көкжиегі кеңи бер­мек. Турнирдің өтуіне ұйым­дас­­тыру комитетінің төр­ағасы Ұлықпан Сыдықов, Тү­­сіп­хан Түсіпбеков сияқты спорт жанашырлары көп үлес қос­ты. Жасы сексенге тая­ған Астанадан келген қа­рия Ма­рат Досқожановқа «Ар­дагер» деген сыйлық тарту етілді.

 

Оңдасын ЕЛУБАЙ,

Қазақстанның құрметті спорт қызметкері