Еңбек күні қыркүйектің соңғы жексенбісінде жыл сайын аталып өтіп келеді. Бүгін де барлық еңбек ардагері марапатталып, аймақ басшысы Ермек Беделбайұлы Еңбек және халықты әлеуметтік қорғау министрлігі атынан «Еңбек ардагері» медалін тоғыз адамға табыс етті.
– Елімізде жұмысшы мәртебесін арттыру мақсатында еңбек адамы идеясын насихаттап, оларға жан-жақты қолдау көрсетуге ерекше көңіл бөлініп жатыр. Мемлекет басшысы Қасым-Жомарт Тоқаев атап өткендей, нағыз еңбек адамы – ол істің адамы. Яғни әр ісіне, әр қадамына жауапкершілікпен қарайтын адал азамат. Береке-бірлік пен қажырлы еңбектің арқасында мемлекетімізді дамытып, халықтың жағдайын жақсартамыз. Облыстағы түрлі салада жұмыс істеп, кәсіби маман атанған еңбек адамдарына алғыс айтамын. Қарапайым жұмысшылар қауымына деген құрметіміз әрдайым жоғары, – деді облыс әкімі Е.Көшербаев.
Салтанатты іс-шара аясында алдыңғы қатардан орын алған еңбеккерлер сахнаға шақырылды. «Күршім орман шаруашылығы» орманшысы Оразғали Бақтияров, тракторист-машинист Павел Трегуб, агроном Владимир Ларионов, РОСТ ЖШС жүргізушісі Александр Колесников, «Терезе» ЖШС бас инженері Қазыбай Қадырбеков сынды азаматтар «Еңбек ардагері» медалін иеленді.
Жыл сайын Еңбек күнін атап өту қарсаңында отбасылар өңір атынан республикалық конкурсқа қатысып отырады. Бұл ретте «Еңбек жолы» деп аталатын байқауға Аушиновтер әулеті қатысып, жүлделі екінші орынға ие болған. Сонымен қатар «Үздік еңбек династиясы» аталымында осы әулет топ жарып, көпшілік құттықтауына ие болды.
– Мамандығым алғашқы әскери дайындық пәнінің мұғалімі болғанымен, металлург болып қызмет еттім. Қазір Риддер қаласындағы тау-кен металлургия кешенінде жұмыс істеймін. Шамамен 13 жылдай болды. Әулетіміздегі алғашқы металлург – атам Мәлік Аушинов. Анамның нағашы ағалары да осы жолмен жүріп, өз кезінде түрлі марапаттарға ие болды. Сонау 1973 жылдан бүгінге дейін алып қарасақ, әулетіміздің еңбек өтілін қосқанда 181 жылға жетеді, – деді Ринат Ерболұлы.
«Өндіріс саласының үздік жас маманы» аталымы бойынша сахнаға бірінші болып Дарын Шағыманов шақырылды. Бұдан соң тоңазытқыш жұмысшысы Гүлжанат Жұмаділқызы, Риддердегі «Сталь Тех Снаб» ЖШС-да токарь болып істейтін Мәди Ахметов секілді еңбегімен еленген азаматтар марапатқа ие болды.
Іс-шараның ресми бөлігінен соң еңбеккерлер ән тыңдап, құлақ құрышын қандырды. Абай Қайырбек, Жанат Бисембаев, Арника Байбусынова, Ботагөз Жұмабекова «Отан» әнін шырқап, «Тұран» фольклорлы ансамблі мен «Алтай» халық би ансамблі «Қаражорға» биін тарту етті. Соңында «Ертіс концерт» шығармашылық ұжымы Ескендір Хасанғалиевтің «Атамекен» әнін шырқап, көпшіліктің құрметіне ие болды.
Шығыс Қазақстан облысы
