Пікір • 29 Қыркүйек, 2023

Ел игілігі басты назарда

170 рет
көрсетілді
5 мин
оқу үшін

Мемлекет басшысы ел экономикасын ілгерілетуде ауыл-аймақты дамытуға ерекше ден қойып отыр. Бұл бағытта да Үкіметке «Ауыл аманаты» жобасын ары қарай жандандыру туралы нақты тапсырмалар жүктеді.

Ел игілігі басты назарда

Еліміздің әлеуметтік-эконо­мика­лық әл-ауқатын көтеруге бағытталған Жолдауда да халық көкейінен шы­ғатын ақжолтай мәліметтер аз бол­ған жоқ. Прези­дент ел азамат­тары­ның табысын арттыру үшін 2024 жылдың 1 қаң­тарынан бас­тап ең төменгі жалақы мөлшерін 85 мың теңгеге көтеруді Үкіметке тапсырды. Бұл шара 1 миллион 800 мың адамның, оның ішінде бюджет саласында еңбек ететін 350 мың азаматтың әл-ауқа­тын арттыруға оң септігін тигізетіні анық. Жалпы, кейінгі бес жылдағы Президент Жолдаулары бір-бірімен бітеқай­насып жатыр. Өткен жылы бастау алған саяси жаңғыру жұ­мыстары үлкен экономикалық өзгеріске ұласты.

Осы орайда «Amanat» партиясы Мемлекет басшысының әрбір Жол­дауда әр салаға қатысты айтылған тап­сыр­маларын негізге ала отырып, қоғамның, елдің дамуы үшін ауқымды жобалар ұсынып, соның негі­зінде қыруар жұмыс атқарып келеді. Жолдауда партиялық жобалар да қолдау тауып отыр. Мә­селен, «Жер аманаты» жобасы ая­сында игерілмей жатқан немесе заңсыз берілген 8 миллион гектар жер мемлекет меншігіне қайтарылды. Бұл – «Жер аманаты» комиссиясы жұмысының нақты жемісі. Облыста аталған комис­сияның күшімен өткен жылы 113 мыңнан аса гектар жер мемлекет меншігіне қайтарылса, жыл басынан бері 68 мың гектар жер қайтарылды. Алдағы бес жылда игерусіз жатқан тағы 190 мың гектар жер қайтарылады.

Облыста ауылды дамытуға ар­нал­­ған жаңа тұжырымдамаға ар­қау болып жатқан жоба жайлы айтар болсақ, бүгінде облыста бағ­дар­лама бойынша өңірдегі ауыл тұр­ғындарының табысын арттыруға 8,3 млрд теңге көлемінде қаражат бөлінді. Жоба аясында бүгінгі таңда облыс бойынша жалпы сомасы 2 млрд 668 млн теңгеге өтінім мақұлданды. Бүгінгі күнге ауыл тұрғындарына 664 млн теңгеден аса сомада 98 шағын несие берілді.

Несие алғанмен оны дұрыс игере алмай, мақсатсыз жұмсаудың салдарынан халық қарызға батып жатыр. Құжатта бұл мәселе де Президенттің назарынан тыс қалмады. Табысты өмір сүрудің кілті тек ақша табуда емес, үнемдей білуде. Бұл – баршаға аян қағидат. Қазір бүкіл әлем үнемдеуге бет бұрып отыр. Ол су ресурстарынан бастап, қарапайым отбасы табысын үнемдеуге де қатысты. Біз де осыны үйренуге тиіспіз. Тұрғындардың кредитті шамадан тыс алуы да Президентті қатты алаңдатып отыр. Бүгінде миллионнан астам отандасымыз несиесін төлей алмай жүр. Мемлекет басшысы бұған да нақты жауап берді. Осы орайда азаматтарды жаппай қаржылық сауаттылыққа оқытудың ауқымын кеңейтуді тапсырды. «Amanat» партиясы бұл жұмысты бастап кетті. «Қарызсыз қоғам» жо­басының алғашқы нәтижелері көңіл көншітерлік. Президент бұл жобаны Үкіметпен бірлесіп іске асыруды тапсырды.

Осы орайда, аталған жоба Ал­маты облысында да өз жұмысын белсенді жалғастырып жатқанын атап өткім келеді. Алғашқы аптаның нәтижесін көріп, халықтың жобаға деген жоғары қызығушылығын байқадық. Жыл соңына дейін өңірде 9 мыңға жуық азаматтың қаржылық сауатын арттыру жоспарланған. Жоба аясында қазіргі таңда 5 мыңнан аса тұрғын қаржылық сауатын арттырды.

Жолдаудың тағы бір жетістігі, елімізде Су ресурстары және ирригация министрлігі құрылды. Өйткені, су мәселесі еліміз үшін аса өзекті. Алматы облысында да судың сапасы мен халыққа қолже­тімділігіне қатысты мәселе көп. Енді суға қатысты барлық мәселені шешу осы ведомствоның мойнына жүктеледі. Өңірдің шаруалары жаңадан құрылған министр­лік­тен көп үміт күтеді. Жыл сайын өңірде егін алқаптарын суаруға қажет­ті мөлшердің тең жартысы ысы­рап болып жатады. Арықтар мен ирри­гациялық жүйелердің тозы­ғы жеткен. Сондай-ақ егіншілер де тамшылатып суару әдісін қол­да­на бермейді. Ал Іле ауданында орналасқан «Сорбұлақ» су қойма­сының техникалық мүмкіндігі толық игерілмей келеді. Қоймадағы сумен 10 мың гектардан астам жер­ді молынан суаруға мүмкіндік бар. Алайда, қазір суарылатын егіс­тік көлемі үш мың гектарға да жет­пейді. Ал жасанды көлге 1 млрд текше метр су сияды.

Жолдаудан түйген басты ой – тиім­­ділік. Біз осы тапсырмалардың бәрін жүйелі әрі тиімді орындасақ қана нақты нәтижеге қол жеткіземіз. Тиімді экономика қалыптастырып, игіліктеріміздің бәрін – жер, су, табиғи байлықтарды әділ де тиімді пайдалануымыз керек. Сонда ғана халықтың әл-ауқаты артып, мемле­кетіміз өркен­дейді.

 

Қуат БАЙҚОЖАЕВ,

«Amanat» партиясы

Алматы облыстық

филиалының төрағасы