Еңбек • 29 Қыркүйек, 2023

Білікті хирургтің белесі

239 рет
көрсетілді
3 мин
оқу үшін

Қарағанды медицина университеті клиникасының бас хирургі, хирургиялық ауру­лар кафедрасының профессоры Нұрқаси Абатов республикалық «Еңбек жолы» байқауынан жеңімпаз атанып, мерейі тасыды. Білікті хирург байқаудың «Жұмыс істейтін жастардың үздік тәлімгері» аталымында топ жарды.

Білікті хирургтің белесі

Нұрқаси Төлепбергенұлы – өзінің еңбек жолында 6 мыңнан аса пациентке операция  жасаған жан. Медицинадағы мына бір жетістігі ақ желеңділердің арасында аса құрметпен аталады: елімізде алғаш рет бүйрекке, сондай-ақ механикалық сары ауру кезінде ұйқы безі мен өт жолдарына лапароскопиялық реконструктивті операция жасағаны. Мұ­ны­мен қоса, 1996 жылы Қарағандыда алғаш­қы­лардың бірі болып құрсақ қуысы мүше­лерінің әртүрлі ауруын жедел ем­деудің эндовидеохирургиялық әдістерін тәжірибе жүзінде іске асырған маман.

Одан бөлек, Денсаулық сақтау министр­лігінің клиникалық протоколдарын, оқытудың жаңа әдістерін әзірлеуге үнемі қатысады. Кәсіби білімін жетілдіремін деген дәрігерлер мен хирургтерге арнап 30-ға жуық бейнефильм жасағанын, 100-ден аса ғылыми жарияланымдары барын да қоса кеткеніміз жөн.

Көпжылдық еңбегі бар білікті хирургтің білгенімен бөлісуін азаматтық дер едік. Профессор қосымша студенттер мен резидент дәрігерлерге дәріс оқиды, шеберлік сабағын өткізеді, білгенін үйретеді. Сондай шәкірттерінің бірі – Қарағанды медицина университеті клиникасы хирургия бөлімінің меңгерушісі Руслан Бадыров.

– Нұрқаси Төлепбергенұлының ал­ғаш­қы шәкірттерінің бірі екендігіммен мақ­танамын. Профессордың жетекшілігімен ма­гистратура мен докторантураны бітірдім. Тәлімгерлігімен төрт докторлық және сегіз магистрлік жұмыс қорғадым. Білікті хирург – резидент дәрігерлердің тәлімгері. Өз оқушыларын клиникалық үдеріске бар ынта-ықыласымен жұмылдырады. Талай жас хирургтердің қасында тұрып, операция жасатты. Үнемі ақылын айтады. Өзінің тәжірибесімен бөлісіп, жанашырлық танытып жүреді. Көптеген ізінен ерген хирургтерге жол көрсеткен жомарт кісі, дейді шәкірті Руслан.

Нұрқаси Төлепбергенұлы мед­уни­вер­ситетті тәмамдаған соң ең­бек жолын бұ­рын­ғы Торғай облысының Аман­­­гелді ауда­нында дәрігер-хирург болып бастайды. Кейін Қарағандыға қоныс аударып, қызметін облыстық клиникалық ауруханада жалғастырады. Алғаш 1996 жылы медицина ғылымдарының кандидаты ғы­лыми дәрежесін алады. Одан соң облыстық денсаулық сақтау басқар­масының бас хирургі болып қызмет етеді. Білікті дәрігердің басшылығымен облыс­та алғаш рет амбулаториялық хирургия және травмотология орталығы ашылғанын атап айтсақ, еш артығы жоқ. Хирургиялық оталардың сыныптамасы, емдеу мекемелері тиімділігінің экономикалық есептері, медицина мекемелерінің емдеу қызметі бойынша төлемі әзірленді. Осындай ізгілікті істің бәріне, жалпы Қарағандыдағы денсаулық сақтау саласын жетілдіруге Нұрқаси Абатовтың сіңірген еңбегі мол.

Профессор Нұрқаси Төлепбергенұлының еңбегі ескерусіз емес. Бүгін «Еңбек жолы» байқауында бақ жұлдызы жанса, бұған дейін «Денсаулық сақтау ісінің үздігі» төсбелгісімен марапатталған. Жерлесіміз – «Қазақстанның 100 жаңа есімі» республикалық байқауының да жеңімпазы. 2010 жылы «Үздік хирург» аталымы бойынша Қарағанды облысы әкімі сыйлығының лауреаты.

 

Қарағанды облысы