Аймақтар • 05 Қазан, 2023

Бірқатар өңірде жылыту маусымы басталды

162 рет
көрсетілді
4 мин
оқу үшін

Еліміздің бірнеше өңірінде жылу беру маусымы басталды. Бұл ретте құрамына «СЕВКАЗЭНЕРГО» АҚ, «ПАВЛОДАРЭНЕРГО» АҚ және «АЭСК» АҚ сияқты негізгі кәсіпорындар кіретін «ОАЭК» АҚ белсенді жұмыс атқарып жатыр. Бұл туралы аталған компанияның баспасөз қызметі хабарлады.

Бірқатар өңірде жылыту маусымы басталды

«СЕВКАЗЭНЕРГО» АҚ баспасөз қызметінің мәліметінше, Петропавлда жылыту маусымы 1 қазаннан басталды. Кәсіпорын жаңа жылу беру маусымына жоғары жауапкершілікпен қарап отыр. Жөндеу үдерістерінің маңызды кезеңдері, соның ішінде №3 пен №11 қазандықтарындағы күрделі жұмыстар өз межесіне жетті. Бүгінде №1 мен №10 қазандық агрегаттары жөнделіп бітті. Қазіргі таңда №1 турбоагрегатты толық күрделі жөндеуден өткізу күтіп тұр. Бірақ ол конденсациялық типтегі турбина болғандықтан, оны жөндеу жылыту мерзіміне әсер етпейді. Қалған турбоагрегаттардың жөндеу жұмыстары аяқталды. 8 қазандық пен 5 турбоагрегаты бар ПТЭЦ-2 жұмысын қарқынды атқарып жатыр. Еске сала кетсек, Петро­павлда жылу беру маусымы ресми түрде басталмай тұрып-ақ білім беру мен медициналық мекемелерді жылу жүйесіне қосу қолға алынған еді. Бү­гінде қаланың 118 әлеуметтік нысаны, 31 денсаулық сақтау мекемесі, 258 көпқабатты баспана мен 233 жеке тұрғын үйге жылу берілді. Сондай-ақ қосалқы 77 ғимарат жылыту жүйесіне қосылды. Жоспар бойынша алдағы 7 күннің ішінде барлық нысан жылумен қамтылуы қажет.

Облыс орталығында жылыту мау­сымы басталды. Қысы қатты бола­тын Павлодар қаласы үшін жылу мә­се­лесі әрқашан маңызды. Сол се­беп­ті де «ПАВЛОДАРЭНЕРГО» АҚ-да жылу және электрмен жабдықтау нысан­дарын­д­ағы жөндеу-қалпына кел­тіру жұмыстары алдағы қысқа дайын­дық­тың құрамдас бөлігі саналады. Станса жұмысының барысын бақылап отырған директор Игорь Гринев ЖЭО-3-тің қаланы жылумен қамтуға дайын екенін жеткізді. Дайындық барысында №2, 3 турбоагрегатқа, №2, 4, 6 қазандық­қа күрделі жөндеу жүргізілген. ЖЭО-2-де де №1 қазандық пен №2 турбоагрегаттарына күрделі жөндеу жұмыстарынан өткен. Ал №3 қазандықта жүргізіліп жатқан жөндеу жұмыстары қазанның соңына дейін аяқталады. Павлодарда 2023-2024 жылдарға арналған жылу беру маусымы 18 қыркүйекте басталып, бірінші кезекте әлеуметтік нысандар мен мемлекеттік мекемелер жылуға қосылды. Қазіргі таңда көпқабатты үй­лерге жылу беріліп жатыр.

Екібастұз жылу электр орталығында да жылу беру маусымы басталып кетті. Жылыту маусымы басталар алдында жылумен жабдықтау мамандары күрделі жөндеу мен қайта жаңартудан кейін станса жабдықтары мен жылу желілеріне міндетті сынақтар жүргізді. Абай көшесіндегі қайта жаңартылған магистральдардың сынақтары сәтті өтті, оның барысында бірде-бір зақым анықталған жоқ. Сондай-ақ Мәшһүр Жүсіп көшесіндегі магистральдық құ­быр­ға сынақтар жүргізілді. Биыл Екі­бас­­т­ұзда жылу желілерінің 70 ша­қы­­рым­нан аса магистральдық және орам­ішілік құбырлары жөндел­ді. Қа­зір­гі уақытта Екібастұз ЖЭО-да 4 қазан­дық агрегаты дайын. Оның екеуі іске қосылды. Бас директор Анатолий Моисей дайын қазандық агрегаттары жылыту маусымынан бастап қала­ны жеткілікті жылумен қамтамасыз ететінін мәлімдеді. Екібастұз ЖЭО-ның жөндеу жұмыстарына 585 адам тар­тылса, оның 499-ы – мердігер ұйым­дар­дың қызметкерлері. Барлық шара уақытылы және қаланы үздіксіз жылумен қамтамасыз ету мақсатында жүр­гі­зі­ліп жатыр.

«АЭСК» АҚ жылыту маусымының жұмыс барысын бақылап, оның жоғары жауапкершілікпен жасалып жатқанын хабарлады. Бас директор Александр Павловтың айтуынша, жылу беру мау­сымына дайындық қашанда сапалы деңгейде жүргізіледі. Дайындық сапасы 85%-дан төмен емес. Ал қосалқы стансаларды күрделі жөндеу жұмыстары 93%-ға орындалған.

«ОАЭК» АҚ-тағы жылу және электр желілері бойынша жүріп жатқан жұ­мыс­тар қыс мезгілінде тұрғындарды энергия ресурстарымен қамтамасыз етуге бағытталған. Компанияның қазір­гі мақсаты – барлық жұмысты дәл уақы­тында аяқтап, әрбір үйге жылуды дер кезін­де жеткізу.

 

ОАЭК баспасөз қызметі