Аймақтар • 09 Қазан, 2023

Көшпелі кеңестегі көшелі мәселе

195 рет
көрсетілді
3 мин
оқу үшін

Парламент Мәжілісінің депутаты Аманжол Әлтай төрағалық ететін «Amanat» партиясының жанындағы республикалық «Miras» кеңесінің кезекті көшпелі отырысы Жезқазған қа­ласында өтті.

Көшпелі кеңестегі көшелі мәселе

Ұлытау аймағындағы туризм­ді дамыту мәселесі қаралған жиынға Парламент Мәжілісінің депутаты, кеңес төрағасының орынбасары Ж.Әшімжан, Ұлы­тау облысы мәслихатының төр­ағасы Б.Шыңғысов, Ұлытау об­лысы әкімінің орынбасары Д.Рыс­пеков, кеңестің өңірлік мү­ше­лері, зиялы қауым өкілдері қа­тысты.

А.Әлтай жиынға қатысушы­ларды аймақта туризмді дамы­тудың жай-күйіне қатысты же­тістікті ғана емес, кедергі кел­ті­­ретін мәселелерді де ортаға са­­­луды ұсынды. Облыс әкімінің орын­­басары Д.Рыспековтің баян­дама­сынан өңірде ауыз толтырып айтарлықтай ештеңе жоқтығы аңғарылды. Ізденістер бар, бірақ түйінді тұстар көп.

Ұлт ұясы атанған Ұлытау – та­рихи-мәдени ескерткіштерге өте бай аймақ. Нақты айтқанда, облыс аумағында мұндай ескерт­кіштер саны 494 десек, соның 17-сі рес­публикалық маңызға ие. Сондай-ақ аймақта 35 қа­сиет­ті нысан бар, мұның 25-і жал­пы­ұлт­тық ма­ңызды нысан болып саналады.

Облыс аумағында архео­ло­­гия­лық жұмыстар одан әрі жүр­­гізіліп жатыр. Бұл мақсатта биыл рес­пуб­ликалық бюджеттен 54 млн теңге қаражат бөлініп, Лақпай, Ақтас, Құжал, Ақсай қо­рымдары мен Алтын Орда дәуіріне жататын «Талмас ата» кесе­несінің маңайында қазба жұмыс­тары жү­ріп жатыр. Әрине, алдағы уа­­қытта бұл нысандардан тың жа­­ңалықтар ашылып, ту­ристік бағытты толықтыруы мүм­кін.

Жиында сөз алып, ойын ор­таға салған қоғам белсендісі А.Сүлейменов, Ұлытау ауда­ны­­­ның Құрметті азаматы, ең­бек ардагері Ш.Үмбетов, қол­өнер шебері, «Білеуті» этно­ауы­­­­лының жетекшісі К.Бай­діл­­динов, «Ұлытау» ұлттық му­­зей-қо­ры­ғының басшысы Ә.Кү­­зер­баев, т.б. өңірде ту­­ризмді да­­мыту­дың кешенді жоспары, нақ­ты жо­ба­сы жасалмай отыр­ғанына қын­жылыс білдірді.

Туризмді дамыту үшін жар­қыраған жол, қолжетімді байланыс, сапалы сервис керек десек, осы үшеуі де облыста бір жағына қарай қисайып жатыр. Қомақты қаржыға салынған Жошыхан ке­шенінің де келешегі бұлыңғыр тартып барады. Өйткені мұнда ғы­лыми-зерттеу жұмыстарымен ай­налысуға мүлдем мүмкіндік жоқ. Жиынға қатысушылар Мә­жілістің қос депутатына осы­ған тікелей араласуды ұсы­нып, м­ә­селені шешуді тапсырды.

Атағы дардай Хан ордасының хал-күйі қалай? Алыстан ат арылтып жеткен турист сол жерге бар­ғанда не көреді? Теректі әулие ес­керткішінің мүлдем қараусыз жатуын қалай түсінуге болады? Қа­раусыздықтың салдарынан бұл жердегі тасқа басылған суреттер, петроглифтер жойылып кетпей ме? Ішкі туризмді дамытудың өзі жолға қойылмаған. Жезқазған – Қызылорда, Жезқазған – Арқалық көлік жолдарының нашарлығы да туризмді дамытуға кедергі келтіріп отырғаны түсінікті. Бірақ туристік бағыттарды анық­тап, жол бойында кэмпингтер, са­ни­тарлық-гигиеналық тораптар, қарапайым дәретханалар салуға болмай ма? Өкінішке қарай, об­лыс­та мұндай жұмыстар да әлі қол­ға алынбаған.

Кеңеске қатысушылар осындай толғақты мәселелерді ортаға салды. Жиын қорытысында облыс басшылығына бірқатар ұсы­ныс жолданды.

 

Жезқазған