Айбын • 10 Қазан, 2023

Ақжайықтағы ақжарма жүздесулер

217 рет
көрсетілді
3 мин
оқу үшін

Жуырда Ұлттық ұлан бас қолбасшысының тәрбие және әлеуметтік-құқықтық жұмыстар жөніндегі орынбасары, Халық қаһарманы, генерал-майор Қайрат Үмбетов Батыс Қазақстан облысындағы жұмыс сапары аясында өзара ықпалдастық органдары басшылары және ардагерлер қауымымен кездесулер өткізді.

Ақжайықтағы ақжарма жүздесулер

Қайрат Үмбетов облыс басшы­лы­ғының өңірдегі Ұлттық ұлан әс­ке­рімен әріптестік негіздегі қарым-қаты­настар орнатқаны үшін алғысын білдіріп, құқықтық тәртіп әскерінің Бас қолбасшысы, генерал-лейтенант Еркін Ботақановтың сапар барысына қойған тапсырмалары және маңызды республикалық іс-шараға қатысты жоспарларымен таныстырды. Сондай-ақ Ұлттық ұлан бас қолбасшысының бұйрығымен Батыс Қазақстан облысы әкімінің орынбасары Бақытжан Нарымбетовті «Құқықтық тәртіп әскеріне 30 жыл» мерекелік медалімен марапаттады. Екі тарап осыған дейін қол жеткізілген достық негіздегі әріптестік қарым-қатынастарды әрі қарай да жалғастыруға келісті.

Дәл осындай мерекелік медальмен Орал гарнизоны бойынша әскери прокурор, әділет подполковнигі Марат Бұтымбаев та марапатталды. Қайрат Үмбетов сапар аясында қызметке жаңа тағайындалған әскери прокурормен кездесу өткізді. Қос тарап өңірдегі құқықтық тәртіп пен әскери ортадағы заңдылық туралы пікірлесті. Әділет подполковнигі Марат Бұтымбаев Ұлттық ұлан әскери бөлімдерімен жұмыс барысы туралы әңгімелесе келе, прокуратура қызметкерлерінің әскери ортада заң мен тәртіпті нығайту бойынша әр кез қолдау көрсететінін жеткізді.

– Ұлттық ұлан – құқықтық тәртіп әскері. Өз қызметінде әрқашан заңдылықты сақтау қағидаларын басшылыққа алады. Елімізде тыныштық пен тұрақтылықты қамтамасыз ету, қорғаныс қабілетін нығайту – біздің ортақ міндеттеріміз. Бүгінгі марапатыңыз осы міндетті бірге жүзеге асыруға өз септігін тигізетініне сенімдімін, – деді генерал-майор Қайрат Үмбетов марапатты тапсыру барысында.

Сапар барысында Халық қаһарманы Орал қаласының құрметті ақсақалы, Екінші дүниежүзілік соғыс ардагері Вениамин Сколенкомен де кездесті. Ұлттық ұланның әскери оркестрі ардагердің ауласына келіп, соғыс және патриоттық тақырыптағы шығармаларды орындады. Генерал-майор ардагердің алдында құттықтау сөз сөйлеп, бағалы сыйлықтарды тапсырды.

«Ұлттық ұлан – әскері жауын­гер­лік дәстүрді берік ұстанған әскер түрі. Біз ардагер­ле­рімізге әр кез құрмет көрсетуге, сіз­дер сыйлаған бейбіт күндерді сақ­тауға, елімізді қорғауға дайынбыз», деген ол Ұлттық ұлан бас қол­бас­шысының құттықтау хатын оқып берді.

Ардагер көрсетілген құрметке алғы­сын айтып, халықты бірлік пен достыққа шақырды. Ел қорғауында жүрген аза­мат­тарға зор денсаулық тіледі. Кездесу Ұлттық ұланның 5517 әскери бөлімінің әскери оркестрінің сүйемелдеуімен орындалған шағын концертке ұласты.

 

Дариға ҚҰРМАНАЛЫ,

Л.Н.Гумилев атындағы Еуразия ұлттық университетінің студенті