Осы жиынның құрметті қонағы ретінде Парламент Сенатының депутаты, химия ғылымдарының докторы, профессор, ҰҒА корреспондент-мүшесі Алтынбек Нұхұлы шақырылды. Ол ардагерлерді мерекемен құттықтап, Алаш азаматтарының тұлғасын ашатын мазмұнды әңгіме өрбітті. Сонымен қатар тұңғыш академигіміз Қаныш Сәтбаевтай тұлғалардың еңбегін ұлықтауды да сөз етті.
Басқосу барысында сенаторға жиналған қауым түрлі сұрақ қойды. Бұл ретте қоғамда болып жатқан келеңсіз жайттар, білім, оқулықтардың сапасы, мектептегі буллинг мәселесі көтерілді.
Бұл кездесуге сенатор әкімдіктің ұсынысымен емес, ардагерлердің шақыруымен келді. Ол – туған жеріне туын тіккен азамат. Парасатты, адами қасиеті мол қайраткер. Журналист ретінде білетінім, ол туған жері Баянауылдың Теңдік ауылында «Асыл мұрасын асқақтатқан бабалар» атты мемориалдық кешеннің қазығын орнатып, ата-бабалар рухына арнап ауылында бір жылдары ас берді. Кезінде МәшҺүр Жүсіп атамызға үлкен кесене салу жөнінде ұсыныс жасап, демеушілер тауып, өзі де қаржылай көмектескен еді. Павлодардағы педагогикалық университеттің ректоры қызметінде жүргенде Мұса Шорманұлы, Әбікей Сәтбаев, Бұхар жырау, Мәшһүр Жүсіп, Жүсіпбек Аймауытұлы, Сұлтанмахмұт Торайғырұлы, Қаныш Сәтбаев, Әлкей Марғұлан, Шапық Шөкин, Ермұхан Бекмахановтардың ескерткіш-бюстерін оқу орны алдына орнатты. Алтекеңнің тағы бір үлкен жұмысы – әдебиет пен өнерімізге еңбегі сіңген адамдар туралы «Ертіс-Баян өңірінің 100 тарихи тұлғасы» атты қысқаметражды фильм дайындатты. Қазақтың тәуелсіздігіне үлес қосқан Павлодар өңірінен шыққан 100 атақты адам туралы деректі фильм бүгінде өңірде ғана емес, республика көлемінде бағасын алып, алтын қорда сақталып тұр.
Ал енді Астананың төрінде бой көтерген академик Қаныш Сәтбаевтың ескерткішінің тұрғызылуына үлес қосып, демеушілер тапқан да – Алтынбек Нұхұлы. Ұлт ұстазы, Алаштың көшбасшыларының бірі Ахмет Байтұрсынұлының 150 жылдығын атап өтуді Парламент мінберінен көтеріп, осы мерейтойды ұйымдастыруға белсене қатысты. Сондықтан елдің алдында жоғары деңгейдегі бастамаларға атсалысып жүрген осындай тұлғаның жұртшылыққа айтары да мол. Бұл кездесу осынысымен де мәнді.
Аталған жиынға Астана қалалық ардагерлер кеңесі төрағасының орынбасары Сатыбалды Жұмағатов, саясаттану докторы Әбдіжәлел Бәкір, қаламгер Баянды Әлпи, Астана қалалық Билер кеңесінің төрағасы Әнуарбек Ералы, Алматы ауданы Ардагерлер кеңесінің төрағасы Мұрат Мұстафин, Байқоңыр ауданы Ардагерлер кеңесінің төрағасы Қуаныш Намазшам, Алматы ауданы Ақсақалдар кеңесінің төрағасы Аманкелді Әшіров, тағы басқа зиялы қауым өкілдері қатысты. Ал басқосуға – Байқоңыр ауданы «Белсенді ұзақ өмір сүру» орталығының қазақ тілі пәнінің мұғалімі Маржан Пірімбетова модераторлық етті.
Ғалия БАЛТАБАЙ,
ардагер журналист
