Ең ғажабы, шалғай елді мекен тұрғындарын жоғары медициналық технологиямен қамтамасыз етуді, инновациялық медициналық көмекті жандандыруды мақсат еткен қайырымдылық жобасы арқылы берілген аппараттар сырқаттың себебін, кеселдің уақытын дәл анықтауға мүмкіндік береді. Мобильді ультрадыбыстық аппарат төсек тартып қалған, үйде, машинаның ішінде жатқан науқастың хал-жайын анықтауға көмектеседі. Бұрын ультрадыбыстық аппаратқа түсіру үшін науқасты міндетті түрде ауруханаға апаратын. Өңір әкімінің баспасөз қызметінің мәліметінше, қайырымдылық акциясының бастамашылары – «Philips Foundation» халықаралық коммерциялық емес ұйымы мен «Сәби» қоры. Сонымен қатар дәрігерлерді инновациялық жабдықтармен жұмыс істеуге үйрететін үш күндік оқыту ұйымдастырылды.
Қайырымдылық бастамасын жүзеге асыру үшін мобильді қосымшаның негізінде жұмыс істейтін және планшетке немесе смартфонға қосылған датчиктер жиынтығы – портативті ультрадыбыстық жүйе таңдалды. Бұл инновациялық шешім стационарлық ультрадыбыстық жабдықты пайдалану мүмкіндігі болмаған клиникалық жағдайларда пациенттердің хәлін жедел ультрадыбыстық жағынан бағалау үшін арнайы әзірленген. Бұл, ең алдымен, емдеу мекемелерінің қабырғасынан тыс жерде, яғни оқиға орнындағы қиын жағдайларда медициналық көмек көрсету кезінде қолданылады. Бұл ретте науқастың төсегінде, үйде, жедел жәрдем көлігінде және төтенше жағдайларда көмек көрсетілуі мүмкін.
Дәрігерлер қайырымдылық жобасы аясында жоғары технологиялық медициналық жабдықты пайдалану жөніндегі тренингтерден өтті. Мұнан соң оны клиникалық тәжірибесінде жүрек-қан тамырлары аурулары бар, іш құрылысының сырқаты бар, өкпе аурулары бар науқастарға көмек көрсету үшін, акушерлік-гинекологиялық зерттеулер жүргізу үшін және операция бөлмесінде, реанимация бөлімінде және қарқынды терапияда клиникалық күрделі пациенттермен жұмыс істеуде қолданады.
– Біз инновациялар мен әлеуметтік маңызды бастамаларды тоғыстыру адамдардың өмір сүру сапасын арттыруға ықпал ететініне сенеміз. Дәрігерлердің қолданылуына берілген заманауи портативті ультрадыбыстық жабдық тіпті медициналық ұйымдардан тыс жерлерде де ауыр жағдайдағы пациенттердің жағдайын жедел ультрадыбыстық бағалауға мүмкіндік береді. Дәрігер-клиницистердің қолындағы «Қалталы «ультрадыбыс», бұл медициналық көмек көрсетудің жаңа халықаралық стандарттары саналады, – деді Орталық Азия, Кавказ және Моңғолия аймағындағы «Philips Healthcare» компаниясының өңірлік директоры Ольга Волкова.
Өз кезегінде «Сәби» қайырымдылық қорының президенті Әсел Тасмағамбетова:
– «Сәби» қоры өзінің отандық ауруханаларды инновациялық жабдықтармен жарақтандыру бағытындағы медициналық бағдарламасының мақсаттарына толық сәйкес келетін осындай маңызды жобаға қолдау көрсетті. Портативті ультрадыбыстық жүйелердің көмегімен Жетісу және Алматы облыстарының дәрігерлері әрбір диагнозға сенімді болуы үшін нақты визуализация жүргізе алады. Уақтылы диагноз қою – тиімді емдеудің кілті, – деді.
Атап өтсек, қайырымдылық жобасының бастамашылары бұл іс-шараның мақсаты шалғайдағы және жетуі қиын өңірлердегі пациенттерге жоғары технологиялық медициналық көмектің қолжетімділігін арттыру екенін баса айтады. Осы бастаманың көмегімен Жетісу мен Алматы облысының 7 ауруханасы 18 заманауи медициналық құрал-жабдыққа қол жеткізді, ал 30 дәрігер оқуын жалғастырып жатыр.
Жалпы, 9 мобильді ультрадыбыстық жүйе Алакөл, Панфилов аудандарының аудандық ауруханаларына – 2-ден, Текелі қаласында – 3, сондай-ақ Талдықорған қалалық жедел жәрдем стансасына 2 жабдық беріледі. Осы медициналық мекемелердің 11 дәрігері оқытудан өтеді.
Жетісу облысы
