КӨРЕРМЕН КӨЗАЙЫМЫНА АЙНАЛҒАН 50 ЖЫЛ

Батыс Қазақстандағы көш­басшы телеарна – “Қазақстан” телерадио  корпорациясының Ақтөбе облыстық филиалы  өзінің 50 жылдық мерей­то­йын аудан­дардағы күндерін өт­кі­зумен атап өтуді шешкен-ді. Ау­дан­дық әкімдік пен “Қазақстан-Ақ­төбе” телеарнасы бірігіп ұйымд­ас­тырған “50 жыл сіздермен бір­геміз” атты мерекелік  шара  Ойыл өңі­рінен бастау алды. Аудан әкімі Мұх­тар Жұмағазиев “Қазақстан-Ақтөбе” телеарнасының ұжымын мерей­той­ларымен құттықтады, шы­ғар­ма­шылық табыс тіледі.Ол “Ша­м­шы­рақ-Ақтөбе” ЖШС директоры, бел­гілі ақын Мейірхан Ақдәу­летұлын “Сабақты ине сәтімен” дегендей, 60 жасқа толуымен құттықтап, иығына шапан жапты. Аудандық мәдениет үйінде көрермендермен кездесу өткізіліп, онда облыстық теледидардың қалыптасуы мен бүгінгі ізденістері туралы бейнефильм көр­сетілді. Қазір “Қазақстан-Ақтөбе” теле­арнасы – өзіндік қолтаңбасы қалыптасқан үлкен шығар­ма­шылық ұжым. Оның тізгінін іскер басшы  Раукен Отын­шин  ұста­ғалы бері жаңаша жұмыс істеудің, шығармашылық ізде­ністің көк­жиегі кеңейіп, бұрынғыдан гөрі де биіктен көріне бастады. Бұдан екі жыл бұрын “Қазақстан” теле­ви­зия­сының 50 жылдығын мерекелеу кезінде “Алтын микрофонға” ие  бол­ған ұжымның “Сапар”, “Ана тілім – баба тілім”, “Ақтөбем – ал­тын бесігім”, “Біз айтпасақ, кім ай­тады” және басқа хабарлары көрер­мен­дер көзайымына ай­налды. Бұрын облыстың елді мекендеріне тәу­лігіне бір сағат  хабар тара­ты­ла­тын болса, алдағы уақытта облыс­тың 112 елді мекеніне, яғни облыс аумағының 98 пайызына тара­ты­латын ха­барлар  уақытын 14 сағатқа дейін арттыру жұмыстары жүзеге асырылуда. “Қазақстан” телерадио кор­пора­циясы Ақтөбе облыстық филиа­лы­ның  директоры Раукен Отыншин облыс әкімі Елеусін Сағындықовқа осы мәселені шешуде қаржылай қол­дау көр­сеткені үшін риза­шы­лығын білдірді. Қазір облыстық теле­ар­нада осы заманғы жарықтандыру қон­дырғыларымен жақсы жаб­дық­талған 6 студия бар. Мұнда сондай-ақ, соңғы жылдары жылжымалы теле­визиялық станса сатып алынған. Ол облыстың кез келген жерінен ті­келей хабар беруге мүмкіндік береді. Облыстық телеарнаның Ойыл ауданындағы күндері аясында кезінде Ақтөбе облыстық теле­арнасының қазақ редакциясының бас редакторы болған ойылдық журналист Жандай Тәукебаев атындағы жүлденің жеңім­паздары белгілі журналист Идош Асқар, “Ойыл” газетінің ре­дакторы Серікбай Қойбағаров марапат­талды. Телеарна басшысы Раукен Отыншин мерекелік шараға қатысып отырған Жандай Тәуке­баевтың жары Гүлжан Тәуке­баеваға сый-сияпат жасады. Мерекелік шара елімізге белгілі әншілер Қанат және Света Айтбае­втар бастаған бір топ өнер шебер­лерінің әсем әндерімен әдіптелді. Ойыл ауданының әкімі Мұхтар Жұмағазиев өздеріндегі “Алтын микрофонды” Қобда ауданының әкімі Любовь Исма­ғамбетоваға салтанатты жағдайда тапсырды. Ол эстафетаны қабыл­дап тұрып, облыстық теле­ар­наның 50 жылдығы бұл өңірде де көрерменмен байланысты нығайту бағытында өткізілетініне сендірді. Сөйтіп, билер сөз алып, батырлар ту ұстаған Ойыл өңірінде өткен облыс­тық телеарнаның күні тағылымы мол мә­дени шара ретінде көп­шіліктің көңі­лінен шықты. Сатыбалды СӘУІРБАЙ, Ақтөбе облысы.