Кезінде Федерация кубогі деген атауға ие болған турнирдің тұсауы 1963 жылы кесілді. 2020 жылдан бері оған Билли Джин Кингтің есімі берілді. 1968-1980 жылдар аралығында аталған теннисші «Үлкен дулыға» санатындағы жарыстарда 13 мәрте топ жарды. Тарқатып айтсақ, Уимблдонды 6 рет, АҚШ-тың ашық біріншілігін 4 рет және Аустралияның ашық біріншілігі мен Ролан Гарросты бір-бір реттен ұтты. Сонымен қатар жұптық сайыста 16 және миксте 11 мәрте мерейі үстем болды. Барлығы – 39 турнирде алдына жан салмады! Билли Джиннің одан да басқа толып жатқан атағы бар. Спорттық мансабын аяқтағаннан кейін Кинг бапкер болды. Оның жетекшілігімен АҚШ құрамасы талай толайым табысқа қол жеткізді. Былтыр жарыс Шотландияның Глазго қаласында өтіп, финалда Швейцария мен Аустралия құрамалары шеберлік байқасты. Бұл бәсекеде еуропалықтардың мысы басым болды.
Аталған жарыста АҚШ құрамасының 18 рет асығы алшысынан түссе, Чехия 11 мәрте шашасына шаң жұқтырмады. Бұған қоса Аустралия – 7, Испания мен Ресей – 5, Италия – 4, Франция – 3, Германия – 2, Бельгия, Словакия, Швейцария және ОАР 1 реттен дара шықты. Жекелеген ойыншылар арасында рекордтық көрсеткіш Крис Эвертке тиесілі. Өткен ғасырдың 70-80-жылдары атой салған әйгілі америкалық теннисші 8 додада дараланды. Розмари Касальс пен Билли Джин Кинг жеті рет теңдессіз деп танылды. Олардың екеуі де – АҚШ-тан. Чехиялық Петра Квитова мен Барбора Стрыцова алты мәрте бас жүлдені олжалады. Луция Градецкая мен Луция Шафаржова (Чехия), Кончита Мартинес пен Аранта Санчес-Викарио (Испания) бес реттен дәл сондай құрметке бөленді.
Биылғы Билли Джин Кинг Кубогінде әдеттегідей 12 команда өнер көрсетеді. Қазақстан «В» тобына түсті. Қарсыластарымыз – Аустралия мен Словения. Өзге топтарда мына құрамалар күш сынасады: А тобы – Чехия, Швейцария, АҚШ. С тобы – Испания, Польша, Канада. D тобы – Италия, Германия, Франция.
Пиреней түбегінде Қазақстан құрамасы сапында Елена Рыбакина, Юлия Путинцева, Анна Данилина, Жібек Кұламбаева және Аружан Сағандықова өнер көрсетеді. Алғашқы үшеуінің есімі жанкүйерлерге жақсы таныс. Қазіргі кезде Елена WTA рейтингінде төртінші орында тұрса, Юлия 69 сатыға табан тіреді. Ал Аннаның жұптық сайыста өте керемет ойнайтыны белгілі. Ал Жібек пен Аружан – дарынды жастардың санатында.
Қарсылас командалар ойыншыларының деңгейі жерлестерімізге қарағанда әлдеқайда төмен екені анық. Мәселен, Аустралияның сапында Кимберли Биррелл (әлемдік рейтингте 113-орында), Астра Шарма (120-орын), Оливия Гадеки (132-орын), Арина Родионова (148-орын) сынды теннисшілер өнер көрсетеді. Словенияның сапында Тамара Зиданшек (100-орын), Кайя Юван (104-орын), Вероника Эрьявец (183-орын), Далила Якупович (224-орын), Полона Херцог (327-орын) секілді ойыншылар бар. Жоғарыдағы мәліметтер арқылы В тобының фавориті Қазақстан құрамасы екенін анық аңғаруға болады. Бірақ оларды менсінбеуге еш болмайды. Өйткені жасыл құрлықтан келетін команданданың сапында мықтылар болмағанымен, былтыр олар ақтық сынға дейін алқынбай жеткен. Сондықтан да бұрымдыларымыз бұл турнирде барын салуға тиіс.
12 қарашаға дейін созылатын Билли Джин Кинг Кубогінің жүлде қоры 9,6 млн долларды құрап отыр. Бас жүлдені олжалаған команда 2,4 млн-ды олжаласа, ақтық сайыста ұтылғаны 1,44 млн-ды иеленеді. Жартылай финалға дейін жеткендері 960 мыңды еншілейді. Ал топтық турнирде сүрінген құрамалардың әрқайсысына 480 мың доллардан табыс етіледі.
