Суретті түсірген – К.Гасимов
Талантты өнерпаздың сиқырлы сазға толы кеші «Астана Опера» театрының Күләш Байсейітова атындағы Камералық залында өтті.
Жетіген – көнеден келе жатқан көпішекті музыкалық аспап. Оның жасалуы да, ойнау әдісі де күрделі. Ертеде халқымыз жетігеннің ішегін аттың қылынан тағып, тиектің орнына асықтар пайдаланылған деседі. Аспаптың құлақ күйін осы асықтарды әрлі-берлі жылжытып келтірген.
Жалпы, жетігенге арнап жазылған шығармалар өте аз. Бір жағынан, жетігенде ойнайтын кәсіби музыканттар да санаулы. Сол санаулылардың бірегейі деп Қаракөзді айтуға болады. Ол жетігенді шебер ойнап қана қоймай, оның репертуарын жаңа туындылармен байытып, көне музыкалық аспабымызды тыңдарманға танымал етуге сүбелі үлес қосып жүрген өнерпаз.
Концерт барысында дарынды музыканттың жетігенмен орындаған шығармаларында халқымыздың аңыз-әңгімелерінде айтылатын оқиғалар, жыл мезгілдері әуезді сазбен айшықты өрнектелген. Жетігеннің әсем үні де өзгеше, тыңдаған адамды бірден елітіп әкетеді. Сондай-ақ сахнада жетігенмен бірге сазсырнай, сыбызғы, шертер, адырна, домбыра, қобыз секілді аспаптарымызға жазылған тамаша туындылар ойналды. «Сарыарқа» халық музыкалық ансамблі мүшелері орындаған шығармалар тыңдарманның құлақ құрышын қандырды.
Қаракөз Гасимованың тағы бір қыры – композиторлығы. Оның «Көк бөрілер», «Аңыз дала», «Арын», «Көктем әуені», «Сырлы дала», «Жібек жолы» атты туындылары өнерсүйер қауымға жақсы таныс. Өнер кешінде композитордың «Сенім», «Анама», «Шарын шатқалы», «Туған жер», «Ұлы дала» секілді шұрайлы шығармалары да орындалды.
