Жасыратыны жоқ, өрт сөндіру стансасы мұнда ертеден керек еді. Сәті биыл түсіп, Ақсу-Аюлы ауылынан Балқашқа қарай шығаберіс жолдың бойынан бірінші типті модульдік станса ашылды.
Нысанның ашылу салтанатында облыстық табиғи ресурстар және табиғатты пайдалануды реттеу басқармасының басшысы Бақтияр Санбаев, Шет ауданы әкімінің орынбасары Дәурен Кәрсенбаев, орман шаруашылығында ұзақ жылдар еңбек еткен ардагер Қазыбек Сейітжанұлы, Ақсу-Аюлы ауылының тұрғыны, ардагер Амантай Рашитов құттықтауларын жеткізді.
– Президентіміз Қасым-Жомарт Тоқаев Үкіметке орман, дала өрттерінің алдын алуға қатысты бірқатар міндеттер жүктеген болатын. Осыған сәйкес қаржы бөлініп, еліміздің әр өңірінде жұмыстар қолға алына бастады. Бұл біз үшін өте қажет. Тозығы жеткен техникалар мен өрт сөндіру бекеттерін жаңарту жайы да назардан тыс қалмақ емес. Аталған орман өрт сөндіру стансасы талапқа сай, өртке қарсы қажетті құрал-жабдықтармен қатар, киімдер және арнайы техникалармен қамтылған, сондай-ақ штаттық бірліктер қарастырылған, – дейді Дәурен Кәрсенбаев.
Расымен, модульдік орман өрт сөндіру стансасы заманауи талаптарға сай жабдықталған. Өрт сөндіру көліктері қызметке әзір. Дабыл қағылған сәттен бастап небәрі 1 минут ішінде жолға шығады. Мұнымен қоса, қызметкерлерге арнайы жатын бөлмелер де қарастырылған. Спортзал, асхана мен кәсіби дайындық жасау орындары да бар.
Қарағанды облысы,
Шет ауданы
