«QazaqGaz барлау және өндіру» ЖШС баспасөз қызметі таратқан дерекке жүгінсек, серіктестік басшылығы жоғарыда айтқан жұмыстан бөлек, «Анабай-Жарқұм» газ құбырын салу жұмысын жүзеге асырған. Қазіргі кезде жоспардағы құрылыс-монтаж жұмыстары аяқталған. «QazaqGaz» басқарма төрағасы Санжар Жаркешовтің сөзінше, «Анабай» газ кешенін іске қосу жұмыстары жол картасы жобасы аясында қолға алыныпты.
«QazaqGaz»-ға тиесілі ресурстық базасын арттыру бойынша нақты жұмыстар жүзеге асырылып жатыр. Компанияның тауарлық газ көлемін ұлғайту бойынша қабылдаған «жол картасы» жобасы шеңберінде бірнеше газ кенішін, сондай-ақ «Анабай» кен орнын іске қосу көзделген болатын. «QazaqGaz» газдың өзіндік ресурстық базасын арттыру үшін жер қойнауын геологиялық зерттеуге және жаңа учаскелерді геологиялық барлауға лицензия алу бойынша тиісті жұмыстарды жүргізіп жатыр», дейді ол.
Серіктестіктің алға қойған жоспары айқын. Дерекке сенсек, 2023 жылы газ өндіру көлемін 6,5 млн текше метрге жеткізу көзделген болса, 2028 жылы 44 млн текше метрге жеткізуді мақсат тұтып отыр. Жалпы алғанда «Анабай» кен орнынан алынатын газ көлемі ішкі нарықтың қажеттілігін қамтамасыз ету мақсатында пайдаланылады екен.
«QazaqGaz барлау және өндіру» ЖШС бас директоры Алмас Қуандықов келтірген дерекке жүгінсек, жаңадан іске қосылған «Анабай» кен орнының қоры 4 млрд текше метрді құрайды. Ірі жобаға тартылған инвестиция көлемі 12 млрд теңгеге жеткен. Алдағы уақытта кен орнын одан әрі бұрғылау жұмыстарын қолға алуды жоспарлап отыр.
«QazaqGaz «ҰК» АҚ 2022 жылдың қараша айында «Амангелді Газ» ЖШС-ға трансформациялау жүргізіп, атқарылған жұмыстың нәтижесінде ұйым «QazaqGaz барлау және өндіру» атауымен қайта құрылған еді.
Жамбыл облысы,
Мойынқұм ауданы
