Көрме • 20 Қараша, 2023

Панфилов пен оның отбасына арналған көрме ашылды

154 рет
көрсетілді
2 мин
оқу үшін

Қазақстан Республикасы Қарулы күштері мемлекеттік әскери-тарихи мұражайының филиалында Кеңес Одағының Батыры, генерал-майор Иван Васильевич Панфилов пен оның отбасы мүшелеріне арналған «Отбасы тарихы – ел тарихы» атты көрме ашылды, деп хабарлайды Egemen.kz аталған ведомствоның баспасөз қызметіне сілтеме жасап.

Панфилов пен оның отбасына арналған көрме ашылды

Фото: gov.kz

Іс-шараға Қорғаныс министрінің орынбасары генерал-лейтенант Сұлтан Қамалетдинов, Алматы өңірлік гарнизонының қолбасшылығы, әскери жоғары оқу орындарының курсанттары және «Жас сарбаз» әскери-патриоттық қозғалысының тәрбиеленушілері қатысты.

28 гвардияшы-панфиловшылар саябағы Даңқ мемориалындағы Мәңгілік алауға гүл шоқтарын қоюдан басталған іс-шарада екінші дүниежүзілік соғысының, жергілікті ұрыс қимылдары мен Қарулы күштердің ардагерлері сөз сөйледі.

Экспозицияны генерал Панфиловтың немересі, Қазақ КСР-нің еңбек сіңірген өнер қайраткері, белгілі композитор Бақытжан Байқадамовтың қызы ұйымдастырып отыр.

«Отбасы тарихы – ел тарихы» көрмесіне Панфиловтер, Қаралдиндер, Байқадамовтар отбасы мүшелеріне қатысты фотосуреттер, мұрағаттық құжаттар мен олардың тұтынған жеке заттары қойылған. Экспонаттар патшалық Ресей, революция, азаматтық, бірінші және екінші дүниежүзілік соғыстар, сондай-ақ жаппай саяси қуғын-сүргін кезеңін қамтиды.

gov.kz

Көрмені ұйымдастыруға Кеңес Одағының батыры, 316-шы атқыштар дивизиясының командирі генерал-майор Иван Васильевич Панфиловтың 130 жылдығы, оның жұбайы Мария Ивановна Панфилованың 120 жылдығы және қызы Валентина Ивановна Панфилованың 100 жылдығы себеп болған.

Панфилов-Байқадамовтар отбасы өмірінің көп бөлігі Алматы қаласымен тығыз байланысты. Мәскеуді қорғауда өшпес ерлік көрсеткен 316-шы атқыштар дивизиясы Алматы қаласында құрылғаны мәлім.

Бақытжан Байқадамовтың тамаша шығармалары Алматыда жазылды. Ал осы күндері Қарулы күштер мемлекеттік әскери-тарихи мұражайы филиалының директоры Алуа Байқадамова жас ұрпақтың әскери-патриоттық тәрбиесін дамытуға баға жетпес үлес қосып келеді.

Іс-шара аясында Қарулы күштердің Ұлттық әскери-патриоттық орталығы филиалының әртістері Бақытжан Байқадамовтың музыкасына қойылған туындыларды орындады.

gov.kz