Аймақтар • 30 Қараша, 2023

Тұңғыш академиктің мектептегі мұрасы

110 рет
көрсетілді
2 мин
оқу үшін

Алматыдағы Қ.Сәтбаев атындағы университеттің геология кафедрасы Қаражар орта мектебіне құнды тарту жасады. Оқу ұйы­мына түрлі тау жынысы мен минералдар, ғылыми әдебиеттер беріліп, оқушылар тұңғыш ака­де­мик іздеп тапқан қазба бай­лықтармен кеңінен танысуға мүм­кіндік алды.

Тұңғыш академиктің мектептегі мұрасы

Коллекцияда 78 үлгі бар. Олардың әр­қайсысына метал­логениялық сипаттама жасал­ған шағын кітапша да кафедра оқы­тушылары тарапынан тарту етіл­ді. Уни­верситет ректоры Мей­рам Бе­гентаев: «Бұл топтаманы ұлт мақ­та­­ны­шы, Баян­ауылдан шыққан ұлы ға­лым, тұңғыш академик Қаныш Сәт­баев ата­ларыңыздан мектеп оқу­шы­ларына сый­лық деп қабыл­да­ңыздар» деген сәлемін жолдады.

Баянауыл аудандық білім беру бөлі­мінің басшысы Мереке Әбді­кә­рімов­тің айтуынша, гео­логиялық тас­тардың ара­сында шөгінді жыныстар, кристалдар, ме­таморфты ми­нералды құрылыс зат­тары, мәр­мәр, жалпы, елімізде кез­десе­тін пайдалы қазбалардың үлгілері бар.

– Мұндай геологиялық ре­сурс­­­тардың мол қоры біздің өңір­­дегі мектептерде жоқ. Ерек­ше құнды сыйлық әр оқушының геология ғылымына деген қызы­ғушылығын арттырып, ғалым атамыз ұстаған тастар­дың қа­сиеті қабілеттерін ұштайды деген үміттеміз. Академиктің мұ­­расын оқу­шы­ларымыздың бі­лімін арттыруға қолданамыз. Тау жыныстарын қолмен ұстап, көзбен көріп, шынайы сезінуге мүмкіндік берген университеттегі кафедра ұжымына мектеп атынан ерекше алғыс айтамыз. Енді мектеп ұстаздары география са­бағында тау жыныстары, пайдалы қазбалар тақырыптарын өт­кізгенде практикалық түрде оқу­шыларға көрсете алатыны анық. Әрі бұл үлгілерді биоло­гия, жара­тылыс­тану, тарих пән­дерінде пай­далануға да болады, – дейді ол.

Айтып өтейік, Қаражар ауы­лында биыл демеушілер қара­жатына 100 орындық заманауи мектеп салынды. Керегесі ке­ңей­ген білім беру ұйымының өзі енді негізгі мектептен орта білім беру жүйесіне ауыстырылады деп кү­тіліп отыр. Ал білім ордасында бү­гінде 72 оқушы білім алып жатыр.

 

Павлодар облысы,

Баянауыл ауданы,

Қаражар ауылы