Өңір жаңалықтары

“ЖОЛДА ҚАБЫЛДАУ” ЖАУАПКЕРШІЛІКТІ ҰШТАЙДЫ Ақмола облысының Есіл қа­ласында Ішкі істер министрлігінің Жол полициясы комитеті мен “Нұр Отан” халықтық-демокра­тия­лық партиясының бірлескен ке­зекті “Жолда қабылдау” акция­сы өткізілді. Маңызды шараға Жол полициясы комитетінің төра­ғасы, полиция полковнигі Қайрат Тыныбеков, “Нұр Отан” ХДП қоғамдық қабылдау бөлі­мінің меңгерушісі Жұмажан Жүкенов, республикалық Жол полициясы комитеті ардагерлер кеңесінің төрағасы Садыр Әзбергенов, Есіл ауданының әкімі, “Нұр Отан” партиясы аудандық филиалының төрағасы Сергей Ерин, облыстық ІІД бастығының орынбасары полиция полковнигі Сағатбек Нұрахметов, ауылдық округтер әкімдері мен партия белсенділері, қалың қауым және БАҚ өкілдері қатысты. – Сапарымыздың негізгі мақсаты Елбасы Н.На­зарбаевтың “Жаңа онжылдық – жаңа экономикалық өрлеу – Қазақстанның жаңа мүмкіндіктері” атты Қазақстан халқына Жолдауындағы профилактикалық жұмыстардың жалпымемлекеттік жүйесін құру туралы тапсырмасына сәйкес, республикамыздың Ішкі істер министрлігі тарапынан жол қауіпсіздігінің алдын алу саласында тиісті шаралар атқарылып жатқандығын жұрт­шылыққа жеткізу, – дейді Қ.Тыныбеков. – По­лицияға жүктелген жұмыстың негізгі өлшемі халықтың ішкі істер органына сенімін нығайту, сон­дай-ақ, өз қызметінде азаматтардың конституциялық құқығының сақталуын қамтамасыз ету болып табы­лады. Мұнда қызметтің ашықтығы мен қолжетімділігі, оған бұқараның белсене араласуы табыс тетігі саналады. Сондықтан “Жолда қабылдау” акциясы қоғамның ортақ жауапкершілігін күшейтетініне сенімдіміз. Жол полициясы комитеті 2009 жылы Ақмола об­лысының Қорғалжын, Аршалы, Целиноград, Ерей­ментау аудандарында және Қарағанды, Павлодар облыстарының елді мекендерінде “Жолда қабылдау” акциясын өткізген болатын. Оған 30 мыңнан астам адам қатысып, 6 мыңға жуық өтініш түскен. Арыз-шағымдардың 5400-і қанағаттандырылып, тиісті жауаптар қайтарылған. Бұл кездесулер негізінен насихаттық сипат алса, бүгінгі басқосу жұртшылықпен ашық пікір алмасу және тұрғындарды жеке өтініші бой­ынша қабылдау түрінде өткізілді. Аудандық әкімдік ғи­маратындағы ақпараттық стенділер, мектеп оқушы­­ларының сурет көрмесі және жол полиция­сы­ның жас кө­мекшілерінің шағын концерті жиналғандар көңілінен шық­ты. Сонымен бірге, ұсыныс-тілектер жәшігі орна­ты­лып, сұрау салу парақшалары таратылды. Жәшіктер жұрт­тың көзінше ашылып, арнайы құжаттар ресімделді. Жиналғандар алдында сөйлеген “Нұр Отан” ХДП Орталық аппаратының бөлім меңгерушісі Жұмажан Жүкенов партия қатарында 800 мыңға жуық мүше барлығын, қазіргі таңда саннан сапаға көшуге маңыз беріліп отырғанын жеткізді. Елбасы, партия жетекшісі Н.Назарбаев әрбір адамның өтініш-тілегі, арыз-шағы­мы мұқият қаралып, тиісті шешім қабылдануын тапсы­рып отыр. Республикамызда жұртшылықты қабылдау­дың 258 бөлімі жұмыс істейді. Биылғы төрт айда 214 көшпелі қабылдау ұйымдастырылған. Жұрт­шылықтың партиялық жұмысты жетілдіруге орай ұсыныстары мен пікірлері және жеке басына қатысты арыз-шағымда­ры­ның саны былтырғы сәйкес мерзіммен салыстыр­ғанда 15 пайызға артқан. Бүгінгі дәстүрлі шараның халықпен байланысымызды нығайтудағы ықпалы орасан. Өйткені, мемлекеттік қызметтің өкілдері халықтың ортасына келіп, оларға қолайлы мүмкіндік тудырады, өздері де жергілікті тіршіліктің тынысына қанығып отыр, – деді ол. Акцияны ұйымдастырушылар өткізген “Ашық есік” күнінде Есіл өңірінің көптеген азаматтары өздерін толғандырып жүрген мәселелерге байланысты нақты жауаптар мен тұжырымды кеңестер алды. Бақберген АМАЛБЕК, Ақмола облысы,  Есіл ауданы. ПРОБЛЕМАЛАРДЫ ШЕШУДЕГІ СЕРГЕКТІК Елбасының биылғы халыққа Жол­­дауын одан әрі насихаттау мен саламатты өмір салтын қалыптас­ты­ру бағытындағы жұмыстарды үй­лестіруді мақсат еткен “Нұр Отан” халықтық-демократиялық партиясы облыстық филиалы мен өңірдегі ішкі істер департаменті, жол поли­циясы басқармасының ұйымдас­ты­руы­мен “Жолда қабылдау” акция­сы өткізілді. Еліміздегі мемлекеттік биліктің бірден-бір бастауы – халық десек, олардың Конституцияны, соған сәйкес заңдарды, өзге де норма­тив­тік-құқық­тық актілерді бас­шы­лық­қа алуы қоғам дамуындағы алғы­шарт­­­тардың бірі ретінде қарас­тырылған. “Жолда қабылдау” акциясы ке­зінде осы мәселелерге көңіл бөлген партия мүшелері мен жол поли­ция­сы инспекторлары азаматтарға құқықтық кеңес беру жөніндегі арнайы буклеттерді таратып, заң шеңберіндегі жұмыстарды өрістетті. Жол бойындағы халықпен жүздесулер барысында азаматтар­дан 40-тан аса өтініш-шағым түс­кен. Олардың арасында жол по­ли­циясы қызметкерлерінің жұ­мысы мен автокөлік жолдарының бүгінгі жайы, жолаушылар тасы­малдау барысындағы келеңсіздік­тер тізбе­леніп, проблемаларды шешуде сер­гектік танытылатыны мәлімделді. Күмісжан БАЙЖАН, Алматы облысы. ІСКЕР ӘЙЕЛДЕР БАС ҚОСТЫ Семейдегі Қазақ гума­нитар­лық-заңгерлік инновациялық уни­вер­си­теті Президент жанын­да­ғы Әйел­де­р істері және отба­сы­лық-демогра­фиялық саясат жөнін­дегі ұлттық комиссия және Шығыс Қазақстан облыстық әкімдігімен бірлесе отырып “Қазақстандағы гендерлік саясат: билік және қо­ғам” деген тақырыпта халық­ара­лық ғылыми-практикалық конфе­рен­ция өткізді. Конференция жұмысы Абай атындағы сазды-драма театрында ұйымдастырылған “Қанатты әйел – 3” көрме-жәрмеңкесімен ашыл­ды. Оған еліміздің түкпір-түкпі­рі­нен іскер әйелдер әзірлеген тауар­лар қойылды. Жәрмеңкенің мақ­са­ты – жұртшылық назарын ген­дер­лік мәселелерге аудару, іскер әй­елдерді анықтап, насихаттау, олар­дың шығармашылық және көшбас­шылық мүмкіндіктерін ашу, халық­тың гендерлік сезімталдығын арт­ты­ру болса, ол орындалған да секілді. Конференцияның негізгі жұмы­сы жоғарыда аталған университетте өтті. Оның жұмысына Президент Әкімшілігінің қызметкерлері, Пре­зидент жанындағы Әйелдер істері және отбасылық-демографиялық саясат жөніндегі ұлттық комиссия мүшелері, Парламент Мәжілісінің депутаттары, сондай-ақ халық­ара­лық және үкіметтік емес ұйым­дар­дың өкілдері, отандық белгілі ғалымдар қатысты. Конференцияға қатысушылар Ресей Үкіметі жанындағы ұлт­тар істері жөніндегі кеңес прези­диу­мының мүшесі Раушан Қана­пья­нованың, Парламент Мәжілі­сі­нің депутаты Айгүл Соловьеваның, Финляндия Республикасының біз­­дің еліміздегі Төтенше және өкі­летті елшісі Микко Киннуненнің сөздерін зейін қойып тыңдады. Дәулет СЕЙСЕНҰЛЫ, СЕМЕЙ.