Жиынның басты мақсаты – университетте өзгерістер енгізуге және жоғары оқу орындарында жаңа модель қалыптастыруға қабілетті білім көшбасшыларының басқарушылық мүмкіндіктерін дамыту. Ректорлар мектебінде оқу орындарының жаңа модельдері, білім беру жүйесіндегі менеджмент, Альфа ұрпағы үшін университеттердің трансформациясы, еліміздегі алғашқы робот-педагог, жасанды интеллект, HR және адам капиталы, Homelander ұрпағын басқару және ынталандыру сынды тақырыптар қамтылды.
– Мемлекет басшысы Қасым-Жомарт Тоқаев биылғы көктемде Парламент палаталарының бірлескен отырысында: «Білім беру жүйесіндегі менеджментті жақсартуға баса мән берілуге тиіс. Осы салаға нағыз кәсіби мамандарды тарту қажет. Бізде президенттік жастар кадрлық резерві бар. Дәл сол сияқты білім саласына өзгеріс әкелетін 1 мың маман арнайы дайындықтан өтеді. Осыған орай, тиісті бағдарлама қабылданады. Кадр мәселесі жоғары білім беру жүйесі үшін де өте өзекті», деген болатын. Шынымен де, елімізде үлкен өзгерістердің басы дәл осы жоғары білім саласының кәсіби мамандарын даярлауға қатысты болып отыр. Оңтүстік Африкадағы Стелленбош университетінде мынандай түсінік бар: «Кез келген ұлтты жою үшін атом бомбаларын немесе алыс қашықтыққа ұшатын зымырандарды қолдану қажет емес. Ол үшін тек білім сапасын төмендетіп, студенттерге емтихан кезінде алаяқтық жасауға мүмкіндік берсе болғаны. Сондай алаяқтықтың салдарынан науқастар дәрігерлердің қолынан қаза табады, ғимараттар тәжірибесіз инженерлердің кесірінен қирайды, ақшаны да білімсіз экономистер игере алмайды, білімсіз заңгер мен студент кезінде алаяқтыққа жол берген судьялардың салдарынан әділетсіздік орнайды. Білімнің күйреуі – ұлттың күйреуі». Тұтас елдің болашағы дәл осы жоғары оқу орнында берілетін білімге тікелей байланысты деуіміздің төркіні осында жатыр. Жасанды интеллект, цифрлық жүйелер дамыған заманда, жаһандану күшейген шақта білім саласындағы үлкен өзгерістердің негізгі іргетасы саналатын заңдарды өзгерту маңызды, – деді Парламент Сенатының депутаты Бибігүл Жексенбай.
Жоғары оқу орындары қауымдастығының президенті Рахман Алшановтың пікірінше, қазіргі таңда саясат, экономика, технология, өндіріс, ғылым-білім салаларында үлкен өзгерістер орын алып жатыр. Сәйкесінше, маман даярлау оңай емес. Сол себепті басшылар мен ректорлардың өзі әуелі осы өзгерістерге сай болуы қажет. «Қазіргі таңда жоғары оқу орнын басқару үшін шет тілін білетін, шетелде оқып келген ректорларды таңдап жатамыз. Ал ертеңгі күні олар жергілікті жағдайдан хабарсыз болса қайтеміз? Сондықтан біздің мақсатымыз – еліміздегі мәселелерді білетін, кез келген жағдайға дайын мамандарды даярлау. Болашақ маман өзгерістен қорықпайтын, ішкі мәселелерді қиындықсыз шеше алатын азамат болуға тиіс», деді ол.
Үш күнге созылған семинарға еліміздің жетекші жоғары оқу орындарының ректорлары, проректорлар мен декандар, жоғары білім саласындағы мамандар қатысты. «Отандық жоғары оқу орындары білім беру жүйесін түбегейлі өзгертіп, басқарудың жаңа модуліне көшуі қажет. Себебі университет бағдарламалары жаңа мамандықтардың сұранысына сай емес», деген ой айтты сарапшылар.
Еркеназ ҚОРДАБАЙ,
Л.Н.Гумилев атындағы ЕҰУ студенті
