Көкшетау ауыз судан тарықпайды

Су тазарту стансасының жобасы 2009 жылы қолға алына бастаған. Сол тұста қала тұрғындары бөріктерін аспанға атып, «Кенезесі кепкен елдің көсегесі көгеретін болды» деп қуанған еді. 250 мыңнан аса тұрғыны бар қала тұрғындары ерте көктем мен жауынды-шашынды күзде лай, сары су ішіп күнелткен. Басқа амал да жоқ еді. Бұл тұрғыда мемлекеттен қамқорлық болмады деп өкпелеудің де қисыны жоқ. 2011 жылы су желілерін тазарту құрылғылары тегіс жаңғыртылып, тәулігіне 60 мың текше метр су өткізуге қуаты жететін жобаның құрылысы бас­талып та кетті. Тапсырыс беруші – қалалық әкімдіктің құрылыс бөлімі.

Қыруар ел қарап отырған ауқымды жұмысты «AEGISinc» жауапкершілігі шектеулі се­рік­тестігі қолға алды. Сол уа­қыт­т­а мемлекеттік сатып алу тәртібі бойынша 1,623 млрд теңгенің келісім-шар­ты да жасалды. Бірінші жы­лы 538,1 млн теңгесі игеріл­ді. Мердігер ұйым цехтың, зерт­хананың ғимарат­тарын жарым-жартылай ғана кө­терді. Келесі жылы конкурс жұ­мысынан әл­дебір шикілік шығып, қалалық сот жұмысты тоқтату туралы ше­шім шығарды. 2012-2013 жыл­­дары конкурс қайта ұйым­дас­­тырылды. Бұл жолы «АП Им­пекс» жауапкершілігі шек­теулі серіктестігі жеңімпаз болып танылды. 2013 жылы 181,24 млн теңге игерілгенімен, жұмыс тағы да тоқтап қалды. Таза су ішеміз деп тамсанып ай­татын әдемі әңгіме там-тұм­дап ты­йылды. Арада аттай 12 жыл өтті. Енді ғана осы түйт­кілдің түйіні шешілмек. Заманауи қондырғылар Біріккен Араб Әмірліктерінен арнайы жеткізілуде. Қос тарап келісім­шартқа отырған. Отызға жуық жұмысшы мен оннан аса арнайы техника жұмыла жұмыс істеп жатыр.

– Қазіргі күні су тазалау құ­рылғыла­рындағы жұмыс 90 па­йыз аяқталды, алдағы қаңтар айында қажетті қондыр­ғылар жеткізілмек, – дейді мердігер Қуа­ныш Өтегенов.

Сөз арасында Көкшетау қа­ласын сумен қамтамасыз етіп отыр­ған бұл орталықтың сонау 1970 жылы салынғандығын ай­та кетелік. Содан бері күр­делі жөндеу жұмыстары жүргі­зіл­ген емес. Қыруар қаржы бөлін­гені­мен, белгісіз бағытта судай сіңіп кетті. 

– Ендігі іске береке берсін, – дейді қала тұрғыны Қоныс Елі­мов, – атам қазақ «ауру астан» де­мей ме, таза су ішпеген қала тұр­ғындарының ауру-сырқауы көп екендігі айтылып жүр. Ел тілегін айтатұғын болсам, осы жолғы жоба жүзеге асса екен дейміз де.

Биыл су тазалау станса­сының зертханасы мен қазандығы жөндеуден өткізіліпті. Қала басшылығы алдағы жылы көп­шілікті толғандырып отырған ауыз су мәселесі толығымен ше­шіледі деп уәделерін беріп отыр.

– Бұл жобаға жұмсалатын қаржының көлемі – 7 млрд 200 млн теңге. Осы жылы об­лыс­тық бюджеттен 1,5 млрд теңге бағытталды. Мердігер ұйым жұ­мысты тыңғылықты ат­қа­­руда. Күні бүгінге дейін 900 млн тең­генің жұмысы жүзе­ге асырылды. Ойға алған ша­руа алды­мыз­дағы жылы оңы­нан оңға­­рыл­са, алға қойған мін­дет үде­сі­нен шығамыз, – дейді Көк­ше­­тау қа­­лалық әкімдігі құры­лыс бө­лі­мінің басшысы Ардақ Тасқынбай.

Қала тұрғындарының да күт­­кені – осы. Қаржы бар, ендігі   мін­дет – өткеннің ащы сабағын ұмыт­пай қадағалау. 

КӨКШЕТАУ