– Бұл театр астана болған Ақмешітте ашылғанын білесіздер. Осыдан да бізге өнер ұжымының алғашқы уығын шаншып, іргесін қалаған алдыңғы буынның ізі қалған бұл қала өте ыстық. Ал бүгінгі сапарға келсек, талғампаз көрерменнің ойынан шығу – тіпті бөлек әңгіме. Көрерменнің құрметінен бөлек айтар сынына да әзірміз. Өйткені «болдық, толдық» деген өнер ұжымы тоқырайды, – деді Асанәлі Әшімұлы.
Қызылордалықтарды Әуезов театрының әлемімен «Қарагөз» драмасы таныстырды. Көрермендер алдында облыстық мәслихат төрағасы Наурызбай Байқадамов сөйлеп, өнер ұжымына сырбойылықтардың ықыласын жеткізді.
Әуелгіде бойымызды «сахнадан неше жыл түспеген қойылымды бүгінгі көрермен қалай қабылдайды екен?» деген күдік билегені рас. Бірақ классиканың аты классика екендігі осы жолы тағы дәлелденді. Сахнадағы шиеленіскен оқиға мен кейіпкерлер арасындағы шытырман, әр сәтті әдемі әдіптеген әуен бұрынғы мен бүгінгінің арасын үйлестіріп жіберді.
Әуезов театры осы сапар аясында Сыр көрермендеріне «Қарагөз» драмасынан бөлек «Қорқыттың көрі», «Қоштасқым келмейді», «Қара» және «Бес бойдаққа бір той» қойылымдарын ұсынды.
ҚЫЗЫЛОРДА
