Мемлекет басшысы Қасым-Жомарт Тоқаев VIII сайланған Парламенттің бірінші сессиясында сөйлеген сөзінде еліміздегі медицина инфрақұрылымын жақсарту қажеттігін айтқан болатын. «Оның жай-күйіне қатысты түйткілдер аз емес. Мемлекет соның бәрін біртіндеп шешіп жатыр. «Ауылда денсаулық сақтауды жаңғырту» ұлттық жобасы аясында ауыл-аймақта 600-ден астам нысан салу жоспарланған. Жұмыстың бәрі уақтылы әрі сапалы жасалуы керек. Бұл – өте маңызды. Барлық жауапкершілік әкімдерге жүктеледі», деді Президент. Сондай-ақ Мемлекет басшысы бұған дейін Жолдауында алғашқы дәрігерлік көмекті ұйымдастыру тәсілдерін түбегейлі қайта қарау, шалғайдағы өңірлерге көлік арқылы дәрігерлік қызмет көрсету ісін қайта қалпына келтіру шараларын жүзеге асыру, үш жыл ішінде барлық ауылдық елді мекенді фельдшерлік-акушерлік пункттермен және дәрігерлік амбулаториялармен қамтамасыз етуді тапсырған болатын. «Ауылда денсаулық сақтауды жаңғырту» жобасы екі міндетті қамтитынын айта кетелік. Біріншісі – бүкіл ауылдық елді мекендерді медициналық инфрақұрылыммен қамтамасыз ету. Екіншісі – заманауи медициналық жабдықтармен жабдықталған негізгі 5 орталықты қосымша орналастыра отырып, заманауи көпбейінді ауданаралық орталық ауруханалар желісін ұйымдастыру. Бұл ауыл тұрғындарына дер кезінде шұғыл және мамандандырылған медициналық көмек көрсетуді жоғарылатады. Осы орайда облыста «Ауылда денсаулық сақтауды жаңғырту» жобасы аясында 73 дәрігерлік амбулатория, фельдшерлік-акушерлік және медициналық пункттердің кешенді жоспарын әзірлеу қолға алынған. Сөзіміздің басында айтып өткеніміздей, медициналық нысандарға мұқтаж ауылдар көп. Мысалы, Келес ауданына – 20, Мақтаарал ауданына – 12, Жетісайға – 11, Қазығұртқа – 7, Сарыағашқа – 7, Түлкібасқа – 6, Төлебиге – 5, Сауранға – 2, Бәйдібек, Созақ пен Отырар аудандарына бір-бірден жаңа медициналық нысандар қажет. Бұл орайда облыс әкімдігі инвесторлардың ықпалы арқылы мәселені жылдам шешу жолын қарастырып отыр. Жуырда «Атамекен» кәсіпкерлер палатасының облыстық филиалында өткен жиында кәсіпкерлерге медициналық нысандар құрылысына инвестиция салу жөнінде ұсыныс беріліп, мемлекеттік қолдаулар жайы түсіндірілді. Алдағы уақытта ғимараттар бой көтеретін елді мекендер қатары нақтыланып, инфрақұрылымы тереңірек зерделенбек. Медициналық пункт, ФАП, дәрігерлік амбулаторияның жобалық сметалық құжаттары бірыңғай үлгіде дайындалып, ұсынылады. Аталған іс-шара аясында денсаулық басқармасы мен палата өкілдерінен құралатын жұмыс тобы бірлесе жұмыс атқарады. Жалпы, жоспар іске асқан жағдайда инвесторлардың күшімен бірқатар елді-мекенде медициналық жаңа нысандар ел игілігіне беріліп, халықтың ем-дом алуына қолайлы жағдай жасалады.
Өткен жылы өңірде 31 нысанның құрылысы жүргізіліп, 16-сы пайдалануға берілген. Биыл қосымша 14 нысан тапсырылуда. Оның 4-еуі –дәрігерлік амбулатория, 10-ы – ФАП. Облыс бойынша құны 185 млрд теңге болатын ірі 6 медициналық нысанның құрылысы жоспарлануда. Түркістан қаласында 570 орынды көпбейінді аурухана, облыстық балалар ауруханасы, «Ана мен бала» орталығы, сондай-ақ Ордабасы ауданында перинаталдық орталық салынады. Аталған 570 төсектік орындық көпсалалы аурухана құрылысы түркиялық инвестор «YDA Holding» есебінен жүргізілуде. Бүгінде құрылыс жұмыстарының 40% аяқталды. Келесі жылдың соңында қолданысқа беріледі деп жоспарлануда. «Өңірдегі медициналық ұйымдарда 5,5 мыңнан астам дәрігер және 19 мыңнан астам орта буынды қызметкер халыққа қызмет көрсетеді. Медициналық жабдықтармен қамту деңгейі 84 пайыздан асып, жоспар толығымен орындалды. Нәтижесінде, негізгі ауру-жітім көрсеткіші төмендеді. Облыс бойынша 749 медициналық мекеме елге қызмет көрсетуде. Қазіргі таңда бейінді мамандарға тапшылық байқалуда. Осы мәселені шешу үшін биыл облыс есебінен бейінді мамандарды оқытуға, резидентураға 60 грантқа қаржы бөлінді. Сонымен қатар ауылға келген жас мамандарға әлеуметтік көмек ретінде 1,5 млн теңге төленуде. Бүгінгі таңда ауылды жерге барған 21 жас маманға әлеуметтік көмек берілген», деді облыс әкімі Дархан Сатыбалды. Ал облыстық жұмыспен қамтуды үйлестіру және әлеуметтік бағдарламалар басқармасының мәліметінше, биыл барлық деңгейдегі бюджеттерден жалпы 11,1 млрд теңге бөлініп, 50 807 техникалық оңалту құралдары мен қызметтері ұсынылған, қажеттіліктің 85,2 пайызы қамтылды. Өңірде 97 075 мүгедектігі бар, оның ішінде 82 174 ересек, 14 901 бала есепте тұр. Сауран ауданы, Оранғай ауылындағы 50 төсектік орынға арналған психоневрологиялық аурулары бар мүгедек балалар үшін арнайы әлеуметтік қызметтер көрсету орталығының құрылысы жүргізілуде. Нысан 2024 жылдың 3-тоқсанында аяқталады деп жоспарланған. Ал Сарыағаш ауданы Қапланбек ауылында негізгі мақсаты балалардың ерте мүгедектігінің алдын алу болып табылатын «Қамқорлық» ерте араласу орталығы ашылды. Аудандық аурухананың базасында орналасқан орталық жыл сайын нейро-ортопедиялық ауруы және олардың туындау қаупі бар 3 жасқа дейінгі 600 баланы қабылдайды. Балалар мұнда тегін оңалту көмегін алады, сонымен қатар диагностикалық аудиологиялық тексеруден және озық жабдықта мидың ЭЭГ-нен өте алады.
Айта кетелік, облыстың 1 630 137 (80%) тұрғыны медициналық сақтандыру жүйесіне қатысу құқығына ие. Жалпы, медициналық ұйымдарға облыс бойынша 2 041 087 тұрғын тіркелген. Дегенмен жүйеде әлі күнге дейін сақтандырылмаған 400 мыңнан аса адам ақысыз қызметтерден тыс қалып отыр.
Түркістан облысы