Фото: ашық дереккөз
Еске сала кетсек, биыл Мемлекеттік кірістер комитеті банк шоттарына кәсіпкерлік қызметпен байланысты ақша түскен азаматтар туралы банктерден ақпарат ала бастады.
«Кәсіпкерлік қызметті жүзеге асыру белгілерін айқындау өлшемшарты жеке тұлғаның үш ай қатарынан ай сайын әр түрлі тұлғалардан жеке банктік шотқа 100-ден астам аударым алуы болып табылады», деп түсіндірді комитет баспасөз қызметі.
Айта кету керек, банктерден ақпарат кезең-кезеңімен беріледі. Дәлірек айтқанда:
- 2023 жылғы 1 қаңтардан бастап – мемлекеттік қызметшілерге, оларға теңестірілген тұлғаларға және олардың жұбайларына (2022 жылдың қорытындысы бойынша);
- 2024 жылғы 1 қаңтардан бастап – мемлекеттік органдардың, квазимемлекеттік сектор субъектілерінің қызметкерлеріне және олардың жұбайларына (2023 жылдың қорытындысы бойынша);
- 2025 жылғы 1 қаңтардан бастап – дара кәсіпкерлер, заңды тұлғалардың басшылары және олардың жұбайлары үшін (2024 жылдың қорытындысы бойынша);
- 2026 жылғы 1 қаңтардан бастап – халықтың қалған бөлігі үшін (2025 жылдың қорытындысы бойынша).
Мемлекеттік кірістер комитеті бақылау шаралары адал салық төлеушілерге әсер етпейтінін және жасырын кірістер мен тіркелмеген кәсіпкерлерді анықтауға бағытталғанын атап өтті.
Бұл ретте жеке тұлғалар өздерінің жеке мақсаттары үшін (мысалы, туыстарына, достарына ақша аудару, ата-аналар мен балаларға көмек көрсету, сондай-ақ басқа да өмірлік жағдайлар үшін) мобильді аударымдарды еркін жүзеге асыра алады.
