1093 халқы бар ауыл бұған дейін салынғанына елу жылдан асқан ескі де тар ғимаратта ем-дом алып жүретін. «Ауыл – ел бесігі» жобасы аясында бой көтерген жаңа ғимараттың іші кең әрі жарық. Медицинаға қажетті құрал-жабдықтармен толық жарақтандырылған. Атап айтқанда, химизатор мен фельдшердің егу, қарау кабинеттері, киім ауыстыратын, жуынатын бөлмелері бар. Бұл кабинеттер алғашқы медициналық көмек көрсету, тұрғындарды иммундау, талдау сынамаларын алу үшін керек-жарақпен қамтамасыз етілген.
– ФАП бір ауысымда 10 емделушіні қабылдауға есептелінген. Олар бұл жерде дәрігерге дейінгі және алғашқы медициналық-санитарлық көмек алады. Халыққа фельдшер, акушер, медбике, сондай-ақ жалпы практика дәрігері қызмет көрсетеді, – дейді Абай аудандық ауруханасының директоры Айгүл Бәшекова.
Ғимараттың жиһаздары жаңартылып, мүмкіндігі шектеулі жандарға ыңғайлы болу үшін пандус, шақыру түймесі мен қозғалыс индикаторы орнатылыпты.
Мұндай игі іс мұнымен тоқтап қалмайды. Алдағы жылдары Абай ауданының елді мекендерінде «Ауылдық денсаулықты жаңғырту» ұлттық жобасы бойынша тағы сегіз медициналық мекеме салу жоспарланып отыр. Юбилейное ауылында ФАП ашылуына жиналған жұртты Абай ауданының әкімі Сәбит Оспанов пен облыстың Денсаулық сақтау басқармасының басшысы Бибігүл Төлегенова құттықтап, жаңа медициналық мекемені аралап көрді.
Қарағанды облысы,
Абай ауданы
