Аймақтар • 21 Желтоқсан, 2023

Мәдениеті мәнді аудан

93 рет
көрсетілді
4 мин
оқу үшін

Батыс Қазақстан облысындағы Қазталов ауданында 32 клуб, 40-қа жуық кітапхана және бір дәстүрлі өнер орталығы халыққа қызмет көрсетеді. Қазталов ауданының әкімі Асланбек Сарқұлов биыл Болашақ ауылдық округіне қарасты Көпкүтір ауылының тұрғындары өз күшімен клуб ғимаратын салып алғанын, жақында қолданысқа берілетінін хабарлады.

Мәдениеті мәнді аудан

Шынында да, бұл аудан тұр­ғындарының ұйымшылдығы, әсі­ресе мәдениетке ерекше көңіл бөлетіні көптен айтылып келе жатыр. 2023 жылы ғана мектеп түлектері мен меценаттардың демеушілігімен ауданда 77 млн 400 мың теңге қаражатқа 45 жоба жүзеге асқан.

Айтпақшы, Батыс Қазақстан облысын­да жекелеген азамат­тар­дың күшімен ашылған үш ауыл музейі болса, соның үшеуі де осы Қазталов ауданында. Олар – Көктерек, Ақпәтер және Қо­шанкөл аулында. Көктерек аулындағы музей марқұм ұстаз Төлеген Сейіткереевтің күшімен ашылса, Ақпәтер музейін еңбек ардагері Кәрім Өтеғұлов құра­ған. Ал Қошанкөл аулындағы халықтық музейдің жәдігерлері тек қана жылқы тақыры­бына жинақталған. Бұлардан бөлек аудандық тарихи-өлкетану музейі де қызмет көрсетіп тұр.

Биыл Қазталов ауданында жаңа бастама қолға алынды. Яғни жыл басынан аудан­дағы 16 округтің орталығына «Қазақ радиосы» орнатылып, көшеде саңқылдап сөйлеп тұра­тын болды. «Алдағы жылы өзге елді ме­кен­дерімізде де осы жұмысты жал­ғастырамыз», дейді аудан әкімі.

Аудан басшысының айтуынша, биыл 29 млн 295 мың теңге қаражат бөлініп, ауданда мәдениет үйлері мен клубтарының материалдық-техникалық базасы жаңар­тылған. Қайыңды аулында жаңа мәдениет үйі салынып жат­са, Қарасу мен Қошанкөл мәде­ниет үйлерін күрделі жөндеуге, Қара­өзенде көпбейінді мәдени-спорт кешенін салуға жобалық-сметалық құжаттама жасалып жатыр екен.

Биыл жазда аудан орталығын­да саяси қуғын-сүргінге ұшыра­ған жерлес қайраткер Мансұр Ғатауллинге арнап «Бесеудің хаты» обелискісі ашылғанын бұ­дан бұрын жазған болатынбыз. Сондай-ақ «Менің кіші Ота­ным» аудандық тарихи-танымдық экспедициясы ұйымдастыры­лып, 3 кезең бойынша зерттеу жұмы­сы жүргізілді. 16 ауылдық округ­ті қамтыған экспедиция барысында 200-ден аса көне құлпытас, ерте темір дәуіріне жататын 100-ге жуық оба, ортағасырлық қала орындары анықталып, құнды жәдігерлер мен кеңестік дәуірдегі ескерткіштер табылды. Сонымен қатар бірқатар ортағасырлық тұрақ анықталып, жәдігер жинақталды. Бұл жұмыстардың қорытындысы үлкен ғылыми-тәжірибелік конференциямен қорытындыланды.

Қазталов аудандық орталық­тандырыл­ған кітапханалар жүйе­сінің 39 кітапхана­сы бар екенін айтқанбыз. Бұлардың ішінде 6 кітапхана заманауи үлгіде жаб­дықталған. Жыл ішінде 1140 шара өтіп, 94 000 көрермен қам­тылған екен.

Ауданда жас буынды кітап­құмарлыққа баулудың керемет үрдісі қалыптасып келеді. Биыл оқушылардың жазғы демалысы кезінде «Мен оқыған 30 кітап» атты жоба жарияланып, оған 5-11 сыныпта оқитын кітапсүйер 34 оқырман қатысты.

Демеушілердің күшімен 1 миллион теңге жүлде қоры тігілген байқаудың қатысу­шы­ларына арнайы диплом, 30 мың теңгелік сер­ти­­фикат табыс етілді. Ал кітап оқуда озып шық­қан Жансая Бекет – 300 мың теңге, ІІ орын жүлдегері Ілияс Қайсағали – 200 мың, ал жүл­делі ІІІ орынға ие болған Тол­ғанай Қыдыр­ға­лиева мен Айым То­лятти атты оқыр­мандар 100 мың теңгелік сертификатқа ие бол­ды.

«Бұл сайысты 2024 жылы облыстық деңгейде өткізетін боламыз», дейді аудан басшысы.

 

Батыс Қазақстан облысы