20 мәрте ұйымдастырылып отырған дүбірлі доп додасында «Манчестер Ситиге» тең келер команда табылмады. Биыл Англияның Премьер-лигасы мен УЕФА-ның Чемпиондар лигасын жеңіп алған Хосеп Гвардиоланың шәкірттері бұл жолы да қарсылас шақ келтірмеді. Джиддада өткен финалдық сайыста олар «Флуминенсемен» күш сынасты. Алаңға Эрлинг Холанн, Кевин Де Брюйне және Жереми Доку сынды белді ойыншылар шықпағанына қарамастан, «МС» бразилиялықтардың қақпасына жауапсыз төрт доп соқты – 4:0. Бұл матчта Хулиан Альварес дубль авторы атанса, Фил Фоден бір мәрте мергендік танытты. Тағы бір голды Нино өз қақпасына салды. Сөйтіп, «МС» өз тарихында тұңғыш рет аталған жарыстың жеңімпазы атанды.
Қола медальды Каирдың «Әль-Ахлиі» олжалады. Үшінші орын үшін бәсекеде Жапонияның «Урава Ред Даймондс» клубын 4:2 есебімен ұтқан мысырлық клуб әлем чемпионатындағы өзінің төртінші қола медаліне қол жеткізді.
