Целиноград ауданының екі тұрғыны құқық қорғау қызметкерлерінің із кесуді ыждағатты жүргізулерінің арқасында қолға түсті. Олардың екі бірдей қылмыстық іс-әрекетке қатысы бары анықталып отыр. Талапкер ауылындағы шаруа қожалығының басшысы белгісіз біреулердің қорасынан жиырма қойын ұрлап кеткені туралы хабарлаған. Шығын бір миллион теңгеге жуық. Өрісте жүрген жерінен ит қуып үркіп немесе желдеп кетті дейтін емес, қамаулы тұрған жерінен қолды болған. Ал екінші ақ адал малынан айырылған тұрғынның қорасынан бес қойы жоғалған. Оның шығыны 300 мың теңгенің төңірегінде.
Полиция қызметкерлерінің жедел алдын алу шараларын жүргізуінің арқасында Қажымұқан ауылының екі тұрғыны қолға түсті. Із кесу барысында ұрылар малды үптеп кетуге келгенде көлік жалдаған. Кейін сойып, сатқан. Айғақ ретінде терісі, үш қойдың еті табылды. Тергеу барысында ұрының бірі осылайша ақша жинап, үйлену тойын өткізгім келді деп ақталатын көрінеді. Мал ұрлап бір басын екеу етпек болғанның енді өз басы дауға қалып отыр.
Сандықтау ауданындағы Жыланды ауылының тұрғындары аяқастынан әбігерге түскен. Тебіндегі 103 бас жылқы ізім-қайым. Мал сүмесімен күн көріп отырған малсақ қауым үшін адам айтқысыз шығын. Алғашқы тәуліктері ауыл тұрғындары түгелге жуық атқа қонып, тау-тастың, орман-тоғайдың ішін сүзіп шыққан. Жып-жылмағай. Соныға түскен бір із болсашы. Құтты жүзден астам жылқыны жел көтеріп кеткендей. Шығыны да отыз миллион теңгенің көлемінде. Өздері таба алмайтын болған соң полицияға хабарлаған. Жалғыз полиция қызметкерлері ғана емес, төтенше жағдай департаментінің қызметкерлері де із кесуге келген. Тіпті аспанға дрон да ұшырылды. Полиция қызметкерлері күре жолдың бойындағы күдікті-ау деген көліктерді тоқтата бастады. Етпен айналысатын алыпсатарлар да назарға алынды. Шағын ауылдың бар жылқысы түгел жоғалса, малсақ қауым жүген ұстап қалмай ма?! Дәл осы күндері қас қылғандай күн күрт суытып, сақылдаған сары аяз күшіне мініп тұрған. Әйтсе де әлсін-әлсін жылынып алған із кесушілер қыруар жылқыны іздеумен болды. Еңбек еш кеткен жоқ, табылды. Жел айдаған тәмам жылқы қыр асып, көрші ауданның аумағына шығып кетіпті. Түстеп түгендесе, түгел.
Қайтқан малдың қайыры бар. Былай қарағанда, анау айтқандай қылмыстық оқиға болған жоқ. Ендеше, неге жазып отырмыз. Қаншама жұртты әуре-сарсаңға салған осы тақылеттес оқиға жиі тіркеледі. Демек мал баққан соң көзден таса етпеген жөн. Қараусыз малға көз салатындар қай жерде болсын кездесіп қалуы әбден мүмкін.
Ақмола облысы
