Мәдениет • 26 Желтоқсан, 2023

Сейіл салған ән қандай!

313 рет
көрсетілді
4 мин
оқу үшін

Сұлу әнге адал болып өткен Сейіл жүректің дамылдағанына бір жыл. Алты ішекті гитарасын қолына алып, «Таң самалынан» бастап, тек есті әндерді шырқайтын Сейілін елі шын пейілімен сағынған екен. Мұны Қарағанды облысы әкімдігінің қолдауымен өткен қазақтың аяулы әншісі Сейіл Аяғанды еске алуға арналған «Сұлу ән, саған адалмын!» атты кешке жиналған қауымның қарасынан аңғардық. Жаңа Майқұдық мәдениет үйінің концерт залына келген көрермен сыймады. Тік тұрып тамашалады. Ал бұл – шын талантқа көрсетілген тағзым, ән құдіретіне көрсетілген құрмет.

Сейіл салған ән қандай!

Суретті түсірген – Ерасыл БАЗЫЛОВ

Кеш шымылдығы «Таң самалын» шырқаған Сейіл Аяған­ның бейнебаян үзіндісімен түрілді. Сахнаға көтерілген «Арай» квар­теті әнді жалғады.

Ақын Серік Сағынтайдың «Ар­қадан Сейіл кетті, Сержан қал­ды», деп аяқталатын өлеңі бар. Сейіл қазақтың бүгінгі Әмі­ресі атанған Сержан Мұсайын бауырының талантын шын пе­йі­лімен бағалады. Сол күміс кө­мей бауыры Ілия Жақановтың «Бұл­бұл еді» әнін шырқады.

Сейілдің мезгілсіз қазасы­нан соң әлеуметтік желіде түрлі шерлі өлеңдер жарияланды. Ар­қа­ның бір топ ақыны әншінің ғажап болмысын сөзбен сурет­теп, жоқтады. Кеште Серік Ақ­сұңқарұлы, Қойлыбай Асан, Тіле­ген Әділов, Серік Сағынтай, Рус­лан Нұрбай, Қайрат Асқар, Сұл­тан Дәулетхан, Айбек Бай­төре өлеңдерін тебіреніспен оқыды.

Дәстүрлі әннің дүлдүлдері Ержан Базарбек «Сурет сырын» шырқаса, Дәуренбек Әркенов «Мең­ді қыз» әнін тамылжыта орындады.

Сейілдің ән-қоржыны бай еді. Арқаның қос жұлдызы Аман­гел­ді мен Зағыпран «Таңғы тілегін», Ержан Найманбай «Сағыны­­шым менің» әнін, Арайлым Жүке­нова «Жіберілген хатын», Шыңғыс Сәрсенбай «Ән-домбырасын», Ербол Алшынбай «Бал сезімін» шырқады. Мұның бәрі де Сейіл­дің сүйікті әндері еді.

Кешке Алатау төрінен аяулы досы, өнер жұлдызы Роза Әлқожа келді. Әдемі дуэт болып, әсем ән шырқаған кездерін сағынғанын әуенмен жеткізе білді. Өнердегі ағасына арнап шығарған «Сейіл-жүрек» әнінің тұсауын кесті.

Мұрат Қоңыр, Бақытжан Рахым­жанов, Саян Мұздыбай, Сейіл Боқаев сынды әнші дос, бауырлары да сахна төрінен та­бы­лып, көрерменді әнмен тер­беді.

Ғажап әнші «Жас қаламы­мен» көпшіліктің жүрегіне жол тапқан еді. Репертуарындағы бұл әннің де шоқтығы сөзсіз биік. Кезінде осы әнге бейне­баян түсіріп, «Youtube» же­лі­сінен 5 мил­лионнан аса қа­ралым жинаған еді. Кешті осы ән­мен түйіндеген та­нымал ән­ші жұп Қуаныш пен Гүлзар кө­рерменді орнынан тұрғызып, қол соқтырды.

«Сейілді сонау тоқсаныншы жылдардан бері аға ретінде, дос ретінде, өнерпаз ретінде біле­тін едік. Әншінің мезгілсіз қа­засы бәріміздің жүрегімізге бат­ты. Сейілдің екінші өмірі бастал­ды деп жатыр. Ағамыздың әннен басқа айтар әңгімесі жоқ-тын. Әнге, өнерге адал еді. Қайда жүр­се де ән ғана айтатын. Жа­қында тұрған үйіне ескерткіш тақ­та орнаттық. Келер жылы рес­публикалық «Сейіл салған әндер-ай...» атты өнер кешін жоспарлап отырмыз. Сейілдің әндерін жи­нақтап, альбом етіп шығару ойы­мызда бар. Сейілдің ізін бас­қан шәкірттері аман болсын», деп жылы лебізін білдірген облыс әкімінің орынбасары Ерлан Құсайын әншінің асыл жары Қымбат Түсіпбекова мен аяулы әнші Роза Әлқожаның иығына елдің атынан қамзол жапты.

«Сейіл ағамызды еске алу ке­ші – әншінің шығармашылы­ғын насихаттаудың бастауы. Ке­лер жылы көктемде ән фестива­лін өткізбекпіз. Әнші ағамыз­дың барлық өнердегі достарына ризашылық білдіреміз. Барлығы атсалысты. Көмек қолын созды. Сырым Хордин мен Мейрам­гүл Сейілханқызы да кешіміз­ді әдемі тізгіндеп берді», дейді кешті ұйымдастырушы Асхат Қажытай.

«Бұл Сейіл – тірі қалған Оғы­зыңдай, Гитара – Қорқытың­ның Қобызындай», деп басталады ақын, Мемлекеттік сыйлықтың иегері Серік Ақсұңқарұлының «Сейілдің гитарасы» атты өлеңі. Осы бір өлең жолынан-ақ Сейіл әншінің аты аңызға айналатынын оңай аңғаруға болады.

Көпшілік кештен «Шіркін-ай, Сейіл салған ән қандай!» деп қимай тарқасты...

 

Қарағанды облысы