Биыл қала бойынша 6,3 шақырым жылу желісі ауыстырылды. Мұхамеджанов көшесіндегі – 580 метр, Сәбитова көшесіндегі – 460 метр, Қараменде Би көшесіндегі 470 метр жылу құбырлары жөндеуден өткен. Әсіресе, Балқаштың Абуғалиев көшесіндегі магистралдық жылу желісі әбден тозғандықтан, апат жиі орын алатын. Енді мұндай апат болмайды. Себебі бұл учаскедегі құбыр толықтай ауыстырылды.
Жылу Балқашта 3 қазаннан бастап, Саяқ кентінде 13 қазаннан бастап берілген. Қаладағы №6, 7, 8, 9 жылыту қазандықтары қалыпты жұмыс істеп тұр. Көмір қоры да жеткілікті екен. Қаладағы 9 білім беру нысаны, 11 денсаулық сақтау саласындағы мекеме мен 593 тұрғын үй толығымен жылумен қамтылып отыр.
Саяқ кентінің жылумен жабдықтау жүйесін реконструкциялау үшін республикалық бюджеттен 500 млн теңге бөлінген. Қазандықтарға 9 жылу алмастырғыш аппараты алынып, орнатылған. Тозығы жеткен 300 метр жылу желілері жөнделген. «Көмір-Krg» ЖШС-мен 86 млн 86 мың теңгеге 6 020 тонна көмір жеткізуге келісімшарт жасасқан.
Жылыту маусымының тұрақты өтуі үшін Балқаш қаласы мен Саяқ кентінде 138 млн 250 мың теңге бөлінді. Жөндеуге қосымша материалдар және апаттық қорға материалдар сатып алынды.
«Әлеуметтік желілерде жылумен жабдықтау сапасы бойынша көптеген сұрақ бар. Барлық сауал – менің жеке бақылауымда. Тұрғын үй қатынастары бөлімі тәулік бойы жұмыс істейтінін және келіп түскен өтінімдер мен өтініштерді пысықтайтынын атап өткім келеді. Жылу көзі – Балқаш ЖЭО жұмысында 4 қазандық агрегаты және 4 турбогенератор бар. Отын қоры мол. «Балқаш Жылу» ЖШС ТНС қала бойынша штаттық режімде жұмыс істейді, қысым мен температура режімі жоспарлы көрсеткіштерге сәйкес келеді. Жылыту маусымының тұрақты өту мәселесі күнделікті бақылауда», дейді қала әкімі Сапар Сатаев.
Былтыр жазда Премьер-министрдің бірінші орынбасары Роман Скляр Балқаш қаласына арнайы жұмыс сапарымен келіп, жылу электр орталығының жұмыс сапасымен танысып кеткен еді. Жаңа бесінші қазандықтың құрылысын көріп кеткен-тін. Қазір жылу магистралінде №5 қазандықтың жекелеген шағын тораптарын монтаждау аяқталуға жақын, жабдық гидравликалық сынақтан және газ-ауа жолының тығыздығын тексеруден өтеді. Болашақта қазандықты орнату «Kazakhmys Energy» ЖШС БЖЭО жұмысын жақсартып қана қоймай, ластаушы заттардың шығарындыларын азайтуға тиіс. Бұл енді алдағы уақыттың еншісінде. Бастысы, қазір қаладағы жылу қалыпты беріліп отыр.
Қарағанды облысы,
Балқаш қаласы
