Еңбекшіқазақ ауданының Есік қаласында қаңтардың 9-ы мен 14-і күндері аралығында өткен ерлер мен әйелдер арасындағы тоғызқұмалақтың классика, рапид, блиц түрлері бойынша бақ сынасқан сайысқа 90-ға жуық спортшы қатысты. Тартысты бәсекеде өңірдің Қонаев қаласы мен Қарасай, Іле, Талғар, Ұйғыр, Жамбыл аудандарынан қатысқан тоғызқұмалақ шеберлері жекелей сында шын жүйріктер қатарынан көрініп, жеңімпаздар тұғырына көтерілді.
«Алматы облысында тоғызқұмалақ ұлттық спорт түрі кеңінен дамып келеді. Ойыншылар арасында республикалық жарыстардың чемпиондары аз емес, Азия және әлем чемпионаттарына қатысып, жүлдегер атанғандар да бар. Осы орайда облыстың шалғай аудандарында ұлттық спорттың орталықтарын, үйірмелері мен мектептерін ашудың маңыздылығы артып отыр. Сонымен қатар спортшыларды ынталандыру мақсатында бағалы сыйлықтар мен түрлі жеңілдікті де қарастыру қажет. Облыс көлемінде өтетін келесі чемпионаттарда осы аталған мәселелерді қолға алмақшымыз», дейді Алматы облыстық тоғызқұмалақ спорты федерациясының президенті Жарас Ниязбек.
Облыстық чемпионаттың қорытындысында жарыс жеңімпаздарымен қатар, өткен жылдың үздік спортшылары мен жаттықтырушыларына да арнайы дипломдар мен сыйлықтар табыс етілді.
Алматы облысы
